Presidentja e Komisionit Europian, Ursula von der Leyen i mbijetoi lehtësisht një vote mosbesimi në Parlamentin Europian të enjten.
Një shumicë e madhe e anëtarëve të Parlamentit Europian mbështetën presidenten e Komisionit Europian të qendrës së djathtë në një mocion besimi të sjellë nga grupi i ekstremit të djathtë “Patriotët për Europën”.
Nga 720 ligjvënësit e BE-së, 565 u paraqitën për të votuar. Vetëm 165 mbështetën rrëzimin e Komisionit, me 390 që votuan kundër dhe 10 që abstenuan. Von der Leyen nuk ishte në Strasburg për votimin, shkruan A2CNN.
Mbështetësit e mocionit argumentuan se von der Leyen dhe ekipi i saj i komisionerëve duhet të shkarkohen për shkak të trajtimit të marrëveshjes tregtare BE-Mercosur, e cila sipas tyre dëmton fermerët evropianë duke hapur tregun evropian ndaj konkurrencës së padrejtë.
Tre mocione të ngjashme ishin rrëzuar tashmë gjatë shtatë muajve të fundit. Pragu i nevojshëm për të shkaktuar një debat dhe votim për mocionin e mosbesimit - 72 nga 720 - ka nxitur përpjekje të përsëritura për të rrëzuar Komisionin.
Debati i mosbesimit i së hënës përpara votimit u zhvillua në një sallë pothuajse të zbrazët, me ligjvënësit që bojkotuan në shenjë proteste kundër përpjekjeve të përsëritura nga e djathta ekstreme dhe e majta ekstreme për të rrëzuar ekzekutivin e BE-së. Edhe kryetari i grupit Patriots, Jordan Bardella, mungoi në këtë ngjarje.
"Sa herë duhet të votojmë për mocionet e pashpresa të mosbesimit derisa ekstremistët të jenë të kënaqur ose të pranojnë vullnetin demokratik?", pyeti Billy Kelleher, duke përfaqësuar grupin Renew Europe në debat. (A2 Televizion)
A2 CNN Livestream
MUND TE LEXONI GJITHASHTU
