Presidenti ukrainas Volodymyr Zelensky këtë të martë ia hoqi shtetësinë kryebashkiakut të Odesës, Gennady Trukhanov, masë që shërbimi i sigurisë së Ukrainës tha se ishte marrë për shkak të faktit se Trukhanov është gjithashtu shtetas rus.
Trukhanov mohoi se ka shtetësi ruse dhe tha se do të apelonte në gjykatë. "Do të mbrohem, do të shkoj në gjykatë. Nëse gjykata nuk mund të vendosë, do të apeloj në Gjykatën Evropiane të të Drejtave të Njeriut. Ky është kulmi, e dini, arbitraritet që nuk mund të lejohet", tha Trukhanov.
Ukraina i ndalon qytetarët e saj të mbajnë shtetësi ruse dhe Trukhanov, i cili ka qenë kryetar bashkie i qytetit portual më të madh të Ukrainës që nga viti 2014, është kritikuar gjatë gjithë karrierës së tij politike për mbajtjen e shtetësisë së dyfishtë.
"Tani kam prova se nuk mundesha, as si person fizik dhe as ligjërisht, të merrja shtetësi ose pasaportë ruse", tha Trukhanov për transmetuesin publik Suspilne.
Shërbimi i Sigurisë i Ukrainës tha sakaq se vendimi për t'i hequr shtetësinë Trukhanov ishte bazuar në provat që kishte siguruar se ai mbante një pasaportë të vlefshme ruse. SBU postoi një foto në Telegram që dukej se tregonte një faqe të fotokopjuar të një pasaporte ruse që mbante emrin dhe fytyrën e Trukhanov.
Trukhanov ka qenë gjithashtu nën hetim që nga viti 2017 me akuza për përvetësim, të cilat ai i ka mohuar. Një burim i njohur me çështjen tha se Zelensky gjithashtu i hoqi shtetësinë ukrainase dy personave të tjerë.
"Shtetësia ruse e disa individëve është konfirmuar. Janë përgatitur vendime përkatëse për ta. Dekreti është nënshkruar", shkroi presidenti në Telegram, pa përmendur emra.
Sipas kushtetutës ukrainase, presidenti ka fuqinë të revokojë shtetësinë.
Mediat ukrainase raportuan ndërkohë se i njëjti dekret i hoqi shtetësinë ukrainase ish-anëtarit të Verkhovna Rada, Oleg Tsarev dhe balerinit Sergei Polunin. (A2 Televizion)
A2 CNN Livestream
MUND TE LEXONI GJITHASHTU
