Presidenti ukrainas Volodymyr Zelensky ka kërkuar nga presidenti amerikan Donald Trump që të përfshijë Kinën në përpjekjet diplomatike për t’i dhënë fund luftës në Ukrainë, duke i kërkuar Pekinit të përdorë ndikimin e tij mbi Moskën.
Gjatë qëndrimit në SHBA, në kuadër të Asamblesë së Përgjithshme të OKB-së, Zelensky u takua të martën me Trumpin. Presidenti ukrainas tha se i ka kërkuar homologut amerikan të ushtrojë presion ndaj Kinës për të ndikuar te Rusia.
Zelensky deklaroi se ende nuk kishte marrë informacion nga Shtëpia e Bardhë lidhur me rezultatet e bisedës mes Trumpit dhe presidentit kinez Xi Jinping, por tha se pret të njoftohet për përmbajtjen e saj.
Sipas Zelenskyt, Uashingtoni po shqyrton gjithashtu mundësinë e zhvillimit të bisedimeve teknike trepalëshe mes SHBA-së, Ukrainës dhe Rusisë, pa pjesëmarrjen e drejtpërdrejtë të liderëve të tre vendeve.
Ukraina pret që SHBA-ja të propozojë një datë për këto bisedime, ndërsa zyrtarët amerikanë kanë sugjeruar Emiratet e Bashkuara Arabe si vendtakim.
Në fokus të bisedimeve të Zelenskyt në SHBA kanë qenë edhe sanksionet ndaj Moskës. Presidenti ukrainas i ka kërkuar Trumpit të vërë në fuqi masat e miratuara nga Kongresi amerikan, duke i cilësuar sanksionet si një mjet të rëndësishëm presioni ndaj Rusisë.
“Sanksionet janë me të vërtetë të fuqishme. E gjithë kjo tani është në duart e presidentit të Shteteve të Bashkuara. Ai mund ta përdorë këtë mjet për të ushtruar presion mbi Federatën Ruse”, u shpreh Zelensky. (A2 Televizion)
A2 CNN Livestream
MUND TE LEXONI GJITHASHTU
