Presidenti ukrainas Volodymyr Zelensky ka paralajmëruar për një zgjerim të mundshëm të përfshirjes së Koresë së Veriut në luftën në Ukrainë, duke deklaruar se deri në 50 mijë ushtarë koreano-veriorë mund të dislokohen në territorin e Rusisë.
Në një reagim të publikuar në platformën X, Zelensky tha se, sipas informacioneve të autoriteteve ukrainase, është marrë vendim për dërgimin në Rusi të 30 mijë deri në 50 mijë trupave nga Koreja e Veriut.
Shifra e përmendur nga presidenti ukrainas është më e lartë se vlerësimet e mëparshme të Kievit, të cilat flisnin për rreth 30 mijë trupa koreano-veriorë.
Megjithatë, Zelensky nuk bëri të ditur burimin e këtij informacioni dhe nuk specifikoi se në cilat zona të territorit rus mund të vendosen trupat.
Presidenti ukrainas deklaroi gjithashtu se autoritetet e Kievit kanë identifikuar raketa të prodhuara në Korenë e Veriut, të cilat, sipas tij, janë përdorur në territorin ukrainas. Ai nuk dha detaje të mëtejshme mbi vendndodhjen ku janë zbuluar këto armë.
Paralajmërimet e Zelenskyt vijnë në një kohë kur bashkëpunimi ushtarak mes Rusisë dhe Koresë së Veriut është thelluar.
Ukraina dhe aleatët e saj kanë akuzuar vazhdimisht Phenianin për mbështetje ushtarake ndaj Moskës, përfshirë furnizimin me municione dhe raketa, si dhe përfshirjen e personelit ushtarak koreano-verior në mbështetje të forcave ruse.
Nëse pretendimi për dislokimin e 30 mijë deri në 50 mijë ushtarëve konfirmohet, një lëvizje e tillë do të përbënte një zgjerim të ndjeshëm të përfshirjes së Koresë së Veriut në konflikt.
(A2 Televizion)
A2 CNN Livestream
MUND TE LEXONI GJITHASHTU
