Presidentja e Komisionit Evropian, Ursula von der Leyen, dhe Kryeministri britanik, Keir Starmer në konferencën e sigurisë në Mynih dhanë mesazhe të forta për forcimin e mbrojtjes evropiane dhe afrimin mes Bashkimit Evropian dhe Mbretërisë së Bashkuar.
Von der Leyen foli për një “zgjim të vërtetë evropian”, duke theksuar se Evropa duhet të ndërtojë kapacitete strategjike në hapësirë, inteligjencë dhe aftësi goditëse.
“Ky është një zgjim i vërtetë evropian dhe ky është vetëm fillimi i asaj që duhet të bëjmë. Duhet të zhvillojmë shtyllën evropiane të kapaciteteve strategjike… Koha ka ardhur për ta sjellë në jetë klauzolën e mbrojtjes së ndërsjellë të Evropës.”
Kryeministri britanik Keir Starmer deklaroi se Evropa duhet të ndërtojë “fuqinë e saj të fortë” për t’u përballur me sfidat e kohës. Starmer njoftoi se Mbretëria e Bashkuar do të dislokojë grupin e saj aeroplanmbajtës në Atlantikun e Veriut dhe në rajonin e Lartë të Veriut këtë vit, në bashkëpunim me Shtetet e Bashkuara, Kanadanë dhe aleatët e NATO-s.
“Nuk jemi në një udhëkryq. Rruga përpara është e drejtë dhe e qartë. Duhet të ndërtojmë fuqinë tonë të fortë… Duhet të jemi gati të pengojmë agresionin dhe, nëse është e nevojshme, të jemi gati të luftojmë për të mbrojtur njerëzit dhe vlerat tona. Mbretëria e Bashkuar do të dislokojë Carrier Strike Group, të udhëhequr nga HMS Prince of Wales, në një demonstrim të fuqishëm të përkushtimit tonë për sigurinë euro-atlantike.”
Ai shtoi se Londra është e gatshme të shqyrtojë afrimin ekonomik me tregun e përbashkët evropian në disa sektorë, në interes të të dyja palëve. (A2 Televizion)
A2 CNN Livestream
MUND TE LEXONI GJITHASHTU
