Ndërrimi i viteve në Prishtinë, mbi 20 raste me lëndime nga mjetet piroteknike

Kryeqyteti i Kosovë, Prishtinë, u mbulua nga fishekzjarrët. Banorët shijuan spektaklin e festave gjatë ndërrimit të viteve.

Në orët e para të së mërkurës, kryeqyteti mori ngjyra të ndryshme nga fishekzjarrët të cilat ndriçuan qiellin mbi qendrën e Prishtinës, duke krijuar një spektakël mahnitës për qytetarët dhe mysafirët e shumtë.

Fishekzjarrët, që filluan në orën 00:00, ishin një simbol i bashkimit dhe dëshirave për një vit të ri më të mbarë, të mbushur me shëndet, dashuri dhe suksese. 

Ndërkohë mbi 20 raste janë trajtuar në Klinikën Emergjente si shkak i lëndimeve të shkaktuara nga mjetet piroteknike.

Shefi i Emergjencës, Agron Çitaku ka bërë të ditur për mediat në Kosovë se të lënduarit janë kryesisht të rinj, ndërkaq dy prej tyre janë të moshës më të thyer.   (A2 Televizion)