Kriza ekonomike që shoqëroi pandeminë mund të mos ketë përfunduar ende, por bizneset dhe qytetarët janë besimplotë për një kthim të shpejtë në normalitet. Treguesi i Ndjesisë Ekonomike regjistroi në fund të muajit Maj nivelin më të lartë që prej Prillit 2019, më lartë edhe se mesatarja historike që mat Banka e Shqipërisë.
Për të gjashtin muaj radhazi, sipërmarrjet në degët kryesore të ekonomisë kanë rritur pritshmëritë për ecurinë e aktivitetit të tyre, për të mbërritur në 103.99 pikë në përditësimin e fundit.
Rritjen më të fortë të besimit e regjistroi tregtia, me pritshmëri më optimiste si për shitjet, ashtu edhe për punësimin dhe porositë e reja. Shumë më optimistë paraqiten edhe bizneset në degën e shërbimeve, sektori i goditur më fortë nga pandemia.
Industria nga ana tjetër pati një përmirësim të lehtë, ndërsa besimi në ndërtim ra lehtë. Megjithëse diçka e pritshme për shkak se prej muajsh qëndronte në nivelin më të lartë historik, si rrjedhojë e bumit të ndërtimeve dhe programit të rindërtimit pas tërmetit.
Sa i takon konsumatorëve, ingranazhit kryesor që lëviz ekonominë shqiptare, konsensusi është se do të bëhet më mirë. Por një pjesë e madhe e qytetarëve mbeten ende në pritje, përpara se të nisin të bëjnë blerje të mëdha.
Të dhënat e INSTAT për inflacionin sugjerojnë se gjatë vitit të kaluar, qytetarët kanë shmangur shpenzimet për gjithçka tjetër që nuk hyn në nevojat bazike. Rimëkëmbja e konsumit në prag të sezonit veror, do të nënkuptonte një frymëmarrje për të gjithë zinxhirin ekonomik. (A2 Televizion)
A2 CNN Livestream
MUND TE LEXONI GJITHASHTU
