Serbë me maska nisin vendosjen e baterive të kamionëve që kanë bllokuar rrugën në lagjen e “Boshnjakëve”

Në lagjen e “Boshnjakëve” në Mitrovicën veriore kanë nisur reagimet e serbëve për heqjen e kamionëve që kanë bllokuar prej disa ditësh rrugën aty.

Në disa pamje ekskluzive të sjella në A2 CNN, shihen disa persona të maskuar, të cilët kanë nisur të vendosin bateritë e automjeteve të tonazhit të rëndë, të vendosura në mes të rrugës.

Kujtojmë se, Policia e Kosovës njoftoi se bazuar në informacionet e fundit, rruga e cila ishte bllokuar më 27 dhjetor, në kilometrin e dytë brenda në Serbi, sot në ora 09:50 është liruar për qarkullim.

Merdara ishte një ndër pikat kufitare të bllokuara prej disa ditësh, për shkak të barrikadave të vendosura nga serbët. Sipas informacioneve të deritanishme, pikat e tjera kufitare në Jarinje dhe Bërnjak mbeten të bllokuara.

Kjo ka bërë që pika kufitare “Dheu i Bardhë” në lindje të Kosovës mbetet më e ngarkuara, ku koha për të hyrë është rreth 10-20 minuta dhe për të dalë 5-10 minuta, sipas raportimeve nga Kosova.

Sipas të dhënave të Qendrës Kombëtare për Menaxhim Kufitar, kjo pikë po shërben si rrugë alternative edhe për të gjithë shtetasit e Kosovës që futen në vend.

Që nga 10 dhjetori, serbët lokalë të ndihmuar nga grupet ekstremiste me mbështetjen e Beogradit kanë vendosur disa barrikada në veri të Kosovës.

Vendosja e tyre është bërë për të kundërshtuar arrestimin e një ish-polici serb nga Policia e Kosovës. Por pas lirimit të tij, të mërkurën u paralajmërua se këto të fundit do të largohen. (A2 Televizion)