“Shëmtira politike,” Alibeaj-Berishës: Një mendësi komuniste mund ta përdhosi kujtimin e heronjve të 2 prillit

Enkelejd Alibeaj ka reaguar pas deklaratave të bëra nga Sali Berisha në emër të tij, më herët gjatë ditës së sotme në Shkodër.

Berisha ishte prezent sot gjatë një ceremonisë përkujtimore të masakrës së 2 prillit në Shkodër dhe sipas kreut të Grupit Parlamentar të Partisë Demokratike, përkujtimi ndaj atyre që dhanë jetën duhej të ishte bërë me nderim dhe heshtje.

“Veçse një mendësi komuniste mund ta përdhosi kujtimin e heronjve të 2 prillit, duke sulmuar të gjithë ata që mendojnë ndryshe nga ai,” shkruan Alibeaj në postimin e tij në Facebook.

Berisha duke iu referuar ish-kryetarit Lulzim Basha dhe Enkelejd Alibeajt tha se çdo votë për ta është votë për Edi Ramën.

“Basha-Alibasha përbën shëmtirën politike më të madhe në 32 vite, çdo votë për ata është votë për Edi Ramën. Ata faktojnë se nuk kanë merituar asnjë mbështetje, janë persona që shqelmojnë mbi veten e tyre, sillen si pengje pa asnjë vlerë," tha Berisha.

Alibeaj shprehej se demokratët duhet të respektojnë  “çdo mendim dhe alternativë dhe jo t’i dorëzohet kultit të individit.”

Përkujtimi dhe respekti ndaj atyre që jetën dhanë në 2 prill, bëhet me nderim e në heshtje. Me reflektim të ndjerë e të thellë për çka dhe përse amaneti i antikomunizmit, lirisë dhe demokracisë ende nuk është çuar në vend! E vend për faj e përgjegjësi ka për çdokënd që pati mundësinë për të kontribuar në këtë drejtim. Nëse nuk ka dashur a mundur sot duhet veçse të heshtë!

Veçse një mendësi komuniste mund ta përdhosi kujtimin e heronjve të 2 prillit, duke sulmuar të gjithë ata që mendojnë ndryshe nga ai.

Ata që dhanë jetën në 2 prill në emër të lirisë dhe demokracisë së munguar për dekada meritojnë respektin dhe nderimin më të lartë sot. Në ditën kur ende zgjatimet e komunizmit përpiqen të mbajnë peng të ardhmen e shqiptarëve për interesat e tyre personale.

Në nderim të jetës së dhënë nga heronjtë e demokracisë, Arben Broci, Nazmi Kryeziu, Bujar Bishanaku dhe Besnik Çeka, të gjithë duhet të perulemi me respekt dhe të vlerësojmë më gjakftohtësi dhe seriozitet rrugëtimin politik të PD në këto 30 vjet. Në emër të vlerave të së cilës ata u vranë pabesisht nga regjimi komunist. Vlerësimi dhe nderimi për jetën dhe veprën e heronjve të 2 prillit do të mbetet në themelet e vlerave mbi të cilat PD u ngrit. Ndaj sot reflektimi për këto vlera duhet të na bëjë më të përgjegjshëm për të çuar në vend jo vetëm dëshirën por dhe idealin e të gjithë atyre që dhanë jetën që sot të jemi të lirë në një vend demokratik. Për të respektuar çdo mendim dhe alternativë dhe jo për t’iu dorëzuar kultit të individit që na mbajti peng për gati 50 vjet! (A2 Televizion)

Enkelejd Alibeaj në Facebook