Shënohet në Teksas vdekja e parë nga varianti Omicron, dominues në SHBA

Varianti Omicron është bërë dominues në Shtetet e Bashkuara, ku përbën 73 përqind të rasteve. Sakaq në kontenë Harris të Teksasit, u shënua ajo që besohet të jetë vdekja e parë e shkaktuar nga Omicron në SHBA.

Presidenti amerikan Joe Biden pritet t’i drejtohet vendit me një fjalim, por Shtëpia e Bardhë tha se nuk po planifikohet izolimi i vendit. Amerikanët janë këshilluar të shmangin udhëtimet në më shumë se 80 vende me rrezik të lartë infektimi, përfshirë pjesën më të madhe të Europës.

Autoritetet bëjnë thirrje për vaksinimin e popullsisë me dozën e tretë, si mënyrë për t’u mbrojtur nga Omicron.

Mes shteteve më të prekura janë Uashington, Oregon, Idaho, Florida, dhe Georgia ku Omicron përbën mbi 90 përqind të rasteve të reja. Kryebashkiaku i Nju Jorkut Bill De Blasio po konsideron nëse duhet të anulojë festën tradicionale për ndërrimin e viteve në Times Square.

Sakaq, Londra duket se ka vendosur të heqë dorë nga festimet në sheshin e famshëm të Trafalgar Square, për të mbrojtur shëndetin publik.

Kryeministri Boris Johnson tha se qeveria duhet të konsiderojë mundësinë e implementimit të masave të reja nëse rastet do të rriten, megjithatë nuk njoftoi kufizime të mëtejshme.

(A2 Televizion)