Janë zgjuar të tmerruar ukrainasit, këtë të premte, ndërsa një shi raketash ra mbi një sërë qytetesh përfshirë edhe Kievin. Të paktën 8 persona mbetën të vrarë, mes të cilëve një grua dhe vajza e saj 3-vjeçare në qytetin e Dnipros.
6 vetë humbën jetën dhe 9 të tjerë u dërguan në spital në qytetin qendror të Umanit, pasi raketat shënjestruan godina banimi. “Shoqja e klasës së vajzës sime jetonte në katin e nëntë të pallatit të shkatërruar. Nuk e di. I lutemi Zotit që të jetë gjallë. Është një tragjedi e madhe”, tha një banore e zonës.
Shpërthime u raportuan edhe në qytetet e Kremenchuk dhe Poltav. Kreu i administratës ushtarake në Kiev tha se kjo ishte hera e parë në 51 ditë që kryeqyteti goditej nga një sulm raketor. Autoritetet bënë të ditur se 21 nga 23 raketa dhe dy dronë sulmi u rrëzuan nga sistemet e mbrojtjes ajrore ukrainase.
Një video e postuar në telegram nga shërbimi shtetëror kufitar tregoi një bllok apartamentesh të dëmtuara rëndë në Uman. Në një reagim pas valës së sulmeve, presidenti ukrainas, Volodymyr Zelensky, tha se e keqja ruse mund të ndalohej vetëm me armë dhe sanksione më të forta. “E keqja ruse mund të ndalohet me armë dhe mbrojtësit tanë po e bëjnë. Dhe mund të ndalohet me sanksionet. Sanksionet globale duhet të fuqizohen. Një tjetër natë terrori nga Rusia. Raketa dhe dronë ranë rreth Ukrainës. Dhjetë godina banimi u dëmtuan në Uman”.
Sulmet vijnë ndërsa forcat ukrainase besohet se po përgatiten për një kundërofensive madhore me pajisje të reja ushtarake, që i janë siguruar nga aleatët perëndimorë, përfshirë edhe tanket. Rusia nuk ka arritur dot të shënojë përparim të rëndësishëm gjatë ofensivës dimërore, përfshirë edhe në betejën 10-mujore për kontrollin e qytetit të rëndësishëm strategjik të Bakhmut. (A2 Televizion)
A2 CNN Livestream
MUND TE LEXONI GJITHASHTU
