Në kalanë e Ishmit u zhvillua mbrëmjen e 22 gushtit “Festa e Ishmit”, një aktivitet kulturor e turistik që synon të promovojë traditat, historinë dhe resurset natyrore të kësaj zone.
Banorë të zonës dhe vizitorë të shumtë morën pjesë në këtë festë, e cila u shoqërua me një program artistik, si dhe me ekspozimin e prodhimeve vendase. Ndër to spikatën bimët medicinale dhe rakia e prodhuar nga rrushi i zonës, të sjella nga fermerët e Ishmit, duke treguar potencialin bujqësor dhe artizanal të territorit, shkruan A2 CNN.
Kryetarja e Bashkisë së Durrësit, Emiriana Sako, e pranishme në këtë festë, theksoi rëndësinë e turizmit si një sektor në zhvillim, duke vënë në dukje rolin e zonës së Ishmit në thithjen e turistëve vendas dhe të huaj. Sipas saj promovimi i pasurive kulturore dhe natyrore është një prioritet, me synimin që këto iniciativa të kthehen në traditë çdo vit.
“Festa e Ishmit” është shndërruar në një urë lidhëse mes trashëgimisë kulturore dhe zhvillimit të qëndrueshëm, duke dhënë një tjetër shembull të gjallë të potencialit turistik që ofron kjo zonë. (A2 Televizion)
A2 CNN Livestream
MUND TE LEXONI GJITHASHTU
