Policia polake ka konfirmuar se personi i armatosur, i dyshuar për vrasjen e gjashtë personave në Krakov, ka ndërruar jetë në spital.
24-vjeçari, për të cilin ministrat thanë se dyshohet se ishte frymëzuar nga “ideologjitë e ekstremit të djathtë”, mbeti i plagosur pasi hapi zjarr në qendër të Krakovit, qyteti i dytë më i madh në Poloni, të shtunën.
Forcat e armatosura të policisë mbërritën me shpejtësi në vendngjarje dhe u përfshinë në një shkëmbim zjarri me të dyshuarin. Zyrtarët bëjnë të ditur se ai u qëllua brenda tre minutave nga nisja e sulmit, duke parandaluar kështu një masakër edhe më të madhe.
Policia e Krakovit njoftoi se autori i dyshuar ndërroi jetë në orët e para të mëngjesit të së hënës.
Pas të shtënave, të cilat nisën pak para orës 15:00 me orën lokale, në sheshin kryesor të qytetit, një zonë mjaft e frekuentuar, policia identifikoi sulmuesin si një 24-vjeçar polak, por nuk bëri të ditur emrin e tij.
Në orët pas sulmit, një ministër deklaroi se hetimet paraprake tregojnë se 24-vjeçari ishte frymëzuar nga “ideologjitë e ekstremit të djathtë”. Ministri e cilësoi gjithashtu atë si një “ultranacionalist”, pa dhënë detaje të mëtejshme.
Deri më tani, është konfirmuar vrasja e gjashtë personave, katër grave dhe dy burrave.
Katër prej viktimave ishin shtetas polakë, ndërsa mes të vrarëve ishte edhe një shtetas britanik dhe një grua austriake. (A2 Televizion)
A2 CNN Livestream
MUND TE LEXONI GJITHASHTU
