Pikëtakimi në Tiranë, Shqipëria po kërkon investitorë. Sllovenia, tregje të reja

Shqipëria po kërkon investitorë, ndërsa Sllovenia tregje të reja. Pikëtakim për të përmbushur dy nevojat u bë Tirana e cila u shndërrua në qendër të dialogut ekonomik dypalësh mes Shqipërisë dhe Sllovenisë.

Forumi ekonomik shërbeu si një platformë e rëndësishme bashkëpunimi për shkëmbimin e përvojave dhe eksplorimin e mundësive konkrete të investimit, duke u dhënë mundësi kompanive sllovene dhe shqiptare të njihen më nga afër me potencialet e ndërsjella të tregjeve respective, shkruan A2.

Laura Saro, drejtoreshë e AIDA, u shpreh: “Jemi partnerët tuaj për të gjetur partnerët e duhur në shqipëri. Ne besojmë se bizneset dhe pronarët nuk janë thjesht vizitorë, por partnerët tanë. Ne kemi trajtim të barabartë, pra të njëjtat kërkesa dhe procedura qoftë për investitorët e huaj, ashtu edhe për sipërmarrësit tanë. Shërbimet tona janë të digjitalizuara dhe mund të provoni të investoni. Ne jemi këtu t'ju ndihmojmë dhe udhëzojmë për mundësitë e biznesit dhe prioritetet që ka Shqipëria. Mendoj se ka shumë mundësi për t'u kthyer në projekte të vërteta”.

Të dhënat nga Banka e Shqipërisë tregojnë se nga viti në vit ka një rritje të investimeve sllovene në Shqipëri të cilat kapën shifrën e 48 milionë eurove vitin e shkuar. Pjesëmarrësit e vlerësuan forumin si një mundësi të rëndësishme për zgjerimin e rrjetit të kontakteve profesionale dhe forcimin e lidhjeve ekonomike mes dy vendeve.

Natasa Kos, drejtoreshë e “Spirit of Slovenia”, u shpreh: “Shqipëria është një ndër tregjet më dinamike në zhvillim në rajon dhe për ne përfaqëson një mundësi shumë të rëndësishme bashkëpunimi ekonomik. Në vitet e fundit kemi vënë re një interes gjithnjë e më të madh nga kompanitë sllovene, të cilat po e shohin Shqipërinë jo vetëm si një treg me potencial, por edhe si një pikë strategjike për zgjerimin e aktivitetit të tyre në Ballkan. Bizneset nga Sllovenia vijojnë të vijnë në Shqipëri, të nxitura nga rritja ekonomike, projektet në infrastrukturë, zhvillimi i turizmit dhe energjisë, si edhe nga mundësitë që ofron sektori i prodhimit dhe shërbimeve”.

Të dhënat zyrtare të INSTAT-it tregojnë se importet nga Sllovenia drejt vendit tonë në vitin 2025 arritën në rreth 60 milionë euro, ndërsa eksportet drejt Sllovenisë llogariten 21 milionë euro. (A2 Televizion)