Normat e interesit të bonove të thesarit, letrave me vlerë të cilat përdoren nga qeveria për të marrë borxh, vijojnë të rriten. Në ankandin e dytë të 2024-s, atë të së martës, norma e interesit të bonove 12-mujore u rrit në 3.44 për qind nga 3.4 për qind që ishte më herët. Nga 14 miliardë lekë të kërkuara, qytetarët dhe sipërmarrësit shqiptarë ofruan 14.8 miliardë lekë.
Njohës të tregut e lidhin shtimin e interesit për të investuar me faktin se pavarësisht se në rënie në raport me një vit më parë, normat e interesit për bonot e thesarit 12-mujore po gjallërohen.
Kjo për shkak të vëmendjes së qeverisë të kthyer aty si kurrë më parë.
Bonot e thesarit 12-mujore pritet të jenë instrumenti kryesor që qeveria do të përdorë për të marrë hua. Nëpërmjet këtyre letrave me vlerë parashikohet të garantohen gati 200 miliardë lekë.
Në total, për të mbuluar deficitin buxhetor, paguar borxhet e vjetra dhe për të financuar disa projekte, qeveria planifikon të marrë 415,2 miliardë lekë hua këtë vit. Sipas planifikimeve të Ministrisë së Financave, pjesa më e madhe e huave, mbi 378 miliardë lekë, pritet të merren brenda vendit. Me anë të një Eurobondi, pritet të sigurohen edhe 36,6 miliardë lekë të tjera.
Rritja e normës së interesit për bonot e thesarit 12-mujore këtë fillim-vit mund të jetë një lajm i keq për kredi-marrësit shqiptarë në lekë të cilët do të duhet të paguajnë më shumë për këstet e tyre të kredisë. (A2 Televizion)
A2 CNN Livestream
MUND TE LEXONI GJITHASHTU
