SHIFRAT | Sa janë rritur investimet e huaja?

Investimet e huaja, një ndër burime kryesore të punësimit dhe valutës që futet në vend ka shënuar rritje këtë vit.

Të dhënat tregojnë se në fund të shtatorit, këto flukse valutore i kapërcyen 1,1 miliardë euro, niveli më i lartë i viteve të fundit.

Por siç thuhet shpesh, djalli qëndron në detaje. E për këtë periudhë, detajet që kanë karakterizuar investimet e huaja kanë qenë dy.

Së pari, shumica e investimeve të huaja kanë qenë riinvestime. Por ato janë ndikuar pjesërisht edhe nga kursi i këmbimit. Ndërkohë që kapitali i ri i injektuar në ekonominë shqiptare ka qenë në rënie të tremujorin e tretë të këtij viti, me 17%.

Por cilët janë sektorët ku kanë shkuar pjesa më e madhe e investimeve të huaja?

Më me interes rezulton tregu i pasurive të patundshme dhe ky është detaji i dytë i investimeve të huaja për këtë vit.  Në blerje banesash apo pronash janë investuar mbi 20% e totalit, pasuar nga ndërmjetësimi financiar, hidrokarburet, energjetika etj.

Kryesisht është bregdeti që ka ngjallur interesin e të huajve për të blerë apartamente, një kërkesë që ka rritur ndjeshëm edhe çmimet.

Investimet në prona të patundshme kapin në total për këtë vit 263 milionë euro, me rritje 18,5% kundrejt një viti më parë.

  (A2 Televizion)