Euro vijon rënien këtë fillim-shkurt. Valuta europiane e mbylli javën në nivelin e vetëm 96.54 lekëve sipas kursit të këmbimit të publikuar nga Banka e Shqipërisë.
“Rënia e euros është një fenomen që po thellohet vit pas viti dhe tashmë nuk flasim më për një luhatje të përkohshme. Para disa vitesh euro konsiderohej si monedhë e fortë dhe simbol stabiliteti për ekonominë shqiptare, por sot po shohim një dobësim të vazhdueshëm, i ndikuar kryesisht nga oferta e lartë e euros në treg”, theksoi Romina Radonshqi, eksperte ekonomie
Të dhënat nga Banka e Shqipërisë tregojnë se krahasuar me shkurtin e një viti më parë, euro ka humbur 2.14 pikë. Edhe më e fortë është rënia nëse krahasohet me shkurtin e vitit 2024.
“Krahasuar me një vit më parë, euro ka humbur mbi 2 pikë, çka tregon se trendi nuk është rastësor. Ndërkohë, nëse e krahasojmë me shkurtin e vitit 2024, rënia është edhe më e ndjeshme. Ky zhvlerësim lidhet me flukset e mëdha valutore që hyjnë në vend, sidomos nga turizmi, remitancat dhe sektorë të tjerë që gjenerojnë të ardhura në euro”, vijoi Radonshqi.
Për shkak të metodologjisë në kursin e këmbimit, edhe valutat e tjera kryesore në vend vijojnë tatëpjetën. Dollari po këmbehet mesatarisht për vetëm 81.85 lekë, paundi britanik për 111.08 lekë ndërsa franga zvicerane për 105.23 lekë.
“Kur monedha kryesore në treg bie, edhe kursi i valutave të tjera ndikohet, pasi tregu funksionon në raport me kërkesën dhe ofertën. Për këtë arsye, zhvlerësimi po prek disa monedha njëkohësisht, duke reflektuar forcimin e lekut në raport me valutën e huaj”, shtoi ajo.
Të dhënat nga Banka Qendrore tregojnë se deri në tetor u këmbyen plotë 11.3 miliardë euro, shifër kjo 2 deri në tre herë më e lartë se në vitet 2019, 2020 apo 2021.
(A2 Televizion)
A2 CNN Livestream
MUND TE LEXONI GJITHASHTU
