Shkëmbimet tregtare të Shqipërisë, cilët janë partnerët kryesorë?

Shqipëria ka një varësi të madhe nga importi dhe rrjedhimisht, edhe nga vendet prej nga ku siguron pjesën më të madhe të produkteve që i nevojiten. Një varësi e tillë e ekspozon vendin tonë nga luhatjet e çmimeve në tregjet ndërkombëtare, veçanërisht kur janë në trend rritës.

Të dhënat tregtojnë se Shqipëria realizon 57.4% të totalit të tregtisë së saj me vendet e Bashkimit Europian. Në këto tregje sigurohet 51.5% e importeve dhe 71.1% e eksporteve.

Por cilat janë vendet, me të cilat realizojmë pjesën dërrmuese të tregtisë, për të kuptuar kështu edhe gjeografinë e shkëmbimeve tregtare?

Partneri ynë kryesor tregtar është Italia me 27.8% të totalit të tregtisë, pasuar nga Kina me 8.5% të shkëmbimeve tregtare dhe Turqia, me 8%. Greqia është zhvendosur në vendin e katërt me vetëm 7.2%, duke humbur kështu në pozicion në raport me Shqipërinë.

Çfarë blejmë dhe shesim ne më së shumti në tregjet e huaja?

Shqipëria importon kryesisht makineri dhe pajisje, si dhe ushqime. Këto janë edhe dy grupet me peshën kryesore në totalin e produkteve që sigurojmë nga jashtë dhe që qartazi dëshmon për  varësinë e madhe të vendit, si në drejtim të produkteve të konsumit të përditshëm si ushqimet, ashtu edhe për funksionimin e industrisë.

Por çfarë eksportojmë ne?

Rezulton se grupi kryesor i eksporteve janë tekstilet dhe këpucët, ato që ndryshe njihen edhe si fasonët, pasuar nga minerale, lëndë djegëse, si dhe materiale ndërtimi dhe metale.

  (A2 Televizion)