Ekzekutimi i djalit të ish-gjyqtarit, nisin hetimet

Pas ekzekutimit me breshëri plumbash të Klaudio Prendit, djalit të ish-gjyqtarit Fran Prendi, policia e Tiranës ka nisur hetimet. Në njoftimin e shpërndarë mëngjesin e sotëm, policia thotë se është ngritur një grup i posaçëm hetimor, në drejtimin e Prokurorisë, po vijon punën për zbardhjen e plotë rrethanave të ngjarjes, dokumentimin e plotë ligjor të saj, identifikimin dhe kapjen e autorit/ëve të dyshuar.

Sipas Policisë ngjarja ndodhi rreth orës 00:36, në rrugën "Xhanfize Keko", ku 30-vjeçari Klaudio Prendi është qëlluar me armë zjarri. Ai u transportua në spital, por ndërroi jetë si pasojë e plagëve të marra.

Më pas rreth orës 01:05, në afërsi të Liqenit të Farkës është konstatuar duke u djegur një mjet tip "Audi", që dyshohet se u përket autorëve.

Klaudio Prendi është djali i ish-gjyqtarit Fran Prendi. 

Fran Prendi ka ushtruar detyrën e gjyqtarit në ish-Gjykatën për Krimet e Rënda prej vitit 2006, detyre që e vijoi për një vit edhe në Gjykatën e Posaçme. Në nëntor 2020 ai u largua nga sistemi i drejtësisë me dorëheqje, pa kaluar në filtrat e vetingut.

Firmën e tij si kryesues e mbajnë dhjetëra vendime gjyqësore,  mes të cilave ai ndaj Emiliano Shullazit dhe grupit të tij në vitin 2018, si edhe ndaj Salvatore Lettizias, një anëtar i Camorras italiane, për masakrën me tre viktima   në bulevardin "Zogu I" në vitin 2015.

Tiranë/Informacion paraprak

Më datë 19.11.2024, rreth orës 00:36, në rrugën "Xhanfize Keko" , dyshohet se është qëlluar me armë zjarri shtetasi K. P., rreth 30 vjeç, i cili është transportuar në spital për ndihmë mjekësore por si pasojë e plagëve të marra ka ndërruar jetë.

Rreth orës 01:05, në afërsi të Liqenit të Farkës është konstatuar duke u djegur një mjet tip "Audi".

Një grup i posaçëm hetimor, në drejtimin e Prokurorisë, po vijon punën për zbardhjen e plotë rrethanave të ngjarjes, dokumentimin e plotë ligjor të saj, identifikimin dhe kapjen e autorit/ëve të dyshuar. (A2 Televizion)