Çdo ditë e më shumë në rrugët e vendit ka jo pak të rinj që lëvizin me armë me vete, duke u kthyer në rrezik potencial. Edhe të shtunën në Laç, sherri mes të rinjve të armatosur i mori jetën një 24 vjeçari dhe plagosi 4 persona, një prej të cilëve shitëse ambulante.
Kjo zonë por edhe të tjera përreth kanë qenë jo pak problematike vitet e fundit ku qytetarë janë përfshirë në grindje që më pas kanë përfunduar në konflikte me përdorim të armëve. Ekspertët thonë se veprimtaria kriminale në këto zona, si Laçi, Lezha e Fushë-Kruja është e trashëguar.
“Ne i kemi parë se si në këtë zonë grupet kriminale aktivitetet e tyre i kanë patur që prej vitive 90’ e deri në ditët e sotme. Ato në një farë mënyre e kanë trashëguar veprimtarinë kriminale”, thotë eksperti Faik Basha.
“Atëherë ose është mungesa e vullnetit politik që i ka lënë këto zona të lira, dhe mund t’i duhen dhe mund t’i vlejnë. Ose mungesë vëmendje, mungesë përgjegjësia e institucioneve”, deklaron Fatjon Softa.
Por a duhet të ketë kontrolle të shtuara të policisë në këto zona? Ekspertët thotë se një pjesë e aksioneve dekonspirohen, e në raste të tjera kontrollohen qytetarë të thjeshtë e jo ata të cilësuar si të fortë.
“Institucionet ligjzbatuese kanë bërë jashtëzakonisht pak për ta menaxhuar aktivitetin e grupeve kriminale në atë zonë”.
“Kjo mendoj nuk është çështje e strukturave lokale, por problematika në drejtim të sigurisë, në drejtim të prokurorisë, në drejtim të gjyqësorit ka qenë nga piramida dhe është shtrirë deri në fundin e saj”, thotë Softa.
“Themi se duhet të dalin në rrugë dhe duhet të bëjnë kontrolle në automjete, them se nuk mund të jetë rastësia për ti kapur ata, por edhe faktin që janë të trimëruar dhe lëvizin me armë në automjete tregon edhe një herë që nuk kanë pasur kontrolle dhe nuk kanë pasur presion të institucioneve dhe nuk e njohin frikën. Ose kanë njohje që në një farë mënyre përkthehen në një lirshmëri që nuk kontrollohen meqë njihen kush janë dhe kontrollohen më shumë vetëm qytetarët e thjeshtë se sa vetë ata si persona. Pra, pjesa e fortë e familjeve të forta, e djemve të fortë u ka krijuar atyre premisa të lëvizin me mjete të shtrenjta, por njëkohësisht dhe të armatosur”, shtoi ai.
Sherri të shtunën mes të rinjve ndodhi i çastit, pas fërkimit të pasqyrave të makinave që ata udhëtonin. 24 vjeçari Gerald Bitri ndërroi jetë në spital, ndërsa 4 të tjerë mbetën të lënduar. Njëri prej të cilëve vijon të jetë në gjendje të rëndë. (A2 Televizion)
A2 CNN Livestream
MUND TE LEXONI GJITHASHTU
