Apeli i Posaçëm lë në fuqi dënimin me 25 vite burg për Blendi Tetën, i fajësuar për vrasjen e ish-efektivit të Policisë, Santiago Malko. Çështja ndaj Tetës u rigjykua në Apel, në zbatim të një vendimi të Gjykatës së Lartë.
Për këtë vrasje, SPAK ka kërkuar edhe dënimin e 6 personave të tjerë.
Ndaj të pandehurve, SPAK kërkon masën e dënimit:
Leonard Duka - 32 vjet burgim/ Dënimi të kryhet në një burg të sigurisë së Lartë.
Erlis Duka - 25 vjet burgim
Fatmir Hyseni - 32 vite burgim
Aleksandër Manxhaku- 22 vjet burgim
Oltjon Loga - 23 vjet burgim
Dritan Agai - 23 vjet burgim
Ata akuzohen për “Vrasje me Paramendim”, “Armëmbajtje pa leje”, “Trafik Narkotikësh”, vepra këto të kryera në formën e Grupit të Strukturuar Kriminal.
Si u vra Santiago Malko?
Leonard Duka akuzohet si një nga autorët e vrasjes së Santiago Malkos në vitin 2019. Ai u arrestua në shkurt 2024 në Belgjikë dhe u ekstradua në vendin tonë në gusht të po atij viti.
Santiago Malko, ish-punonjës i Policisë së Tiranës, mbeti i vrarë mbrëmjen e 27 gushtit të vitit 2019 në një atentat të mirëorganizuar. Ngjarja ndodhi në zonën e Porcelanit në rrugën “Xhanfize Keko” kur drejt makinës së 26-vjeçarit Malko u qëllua me breshëri nga një tjetër makinë në lëvizje.
Santiago Malko ishte një emër i njohur për autoritetet. Në vitin 2016 ka qenë punonjës i Patrullës së Përgjithshme të Policisë së Tiranës ndërsa dyshimet e ekzekutimit të tij ishin për hakmarrje. Kjo pasi Malko mendohej se ishte i përfshirë në një ngjarje kriminale të ndodhur në qytetin e Durrësit. (A2 Televizion)
A2 CNN Livestream
MUND TE LEXONI GJITHASHTU
