Të paktën 30 persona janë vrarë në një sulm rus me bombë rrëshqitëse ndaj dy autobusëve me civilë në qytetin Kramatorsk, në vijën e frontit në lindje të Ukrainës, bëjnë të ditur zyrtarët e emergjencave.
Autoritetet thanë se tre persona të tjerë u vranë në fshatin Bilenke, pjesë e komunitetit të Kramatorskut.
18 persona të tjerë mbetën të plagosur, tha kreu i rajonit të Donetskut, Vadym Filashkin, i cili akuzoi Rusinë se kishte shënjestruar autobusët me pasagjerë me synimin për të vrarë sa më shumë civilë.
Kramatorsk dhe Slovjanski fqinjë janë pjesë e të ashtuquajturit “brezi i fortesave”, të cilin Moska po përpiqet ta pushtojë, si pjesë e pretendimit të presidentit rus Vladimir Putin për të marrë nën kontroll të gjithë rajonin industrial ukrainas të Donbasit.
Presidenti i Ukrainës, Volodymyr Zelensky, tha: “Ky sulm nuk do të mbetet pa përgjigjen tonë.”
Në një postim në Telegram, ai tha: “Rusia po përpiqet të shkatërrojë çdo jetë në Donbas dhe bota duhet të reagojë ndaj kësaj. Të reagojë ashpër – pikërisht ashtu siç e meritojnë rusët për të gjitha vdekjet që kanë shkaktuar.”
Pamjet e publikuara nga prokurorët lokalë treguan skeletin metalik të autobusit të përfshirë nga flakët, së bashku me mbetjet dhe disa prej viktimave në rrugë.
Moska ende nuk ka komentuar për sulmin e fundit. Ai vjen pas një rritjeje të ndjeshme të sulmeve ruse në të gjithë Ukrainën dhe një shtimi të madh të numrit të viktimave civile.
(A2 Televizion)
A2 CNN Livestream
MUND TE LEXONI GJITHASHTU
