Kumbaro reagon pas kritikave ndaj të rinjve që takuan Ramën: Askush nuk duhet të ketë frikë të shprehë mendimin e tij

Nga A2 CNN
22 Nëntor 2026, 12:03 | Politikë

Kumbaro reagon pas kritikave ndaj të rinjve që takuan Ramën:

Ministrja e Arsimit, Mirela Kumbaro, ka reaguar pas kritikave dhe sulmeve në rrjetet sociale ndaj të rinjve që morën pjesë në takimin me kryeministrin Edi Rama. Në një reagim në rrjetet sociale, ajo dënoi gjuhën fyese dhe linçimin online ndaj të rinjve dhe theksoi se pjesëmarrja në një takim me autoritetet publike nuk duhet të kthehet në arsye për paragjykim apo sulm.

Kumbaro bëri të ditur se në takimin që zgjati rreth tri orë, të rinjtë patën mundësi të bënin pyetje, të kritikonin, të shprehnin pakënaqësitë dhe të propozonin ndryshime. Sipas saj, diskutimi u zhvillua në mënyrë të lirë dhe pa detyrim ndaj askujt.

Ministrja e cilësoi shqetësues faktin që të rinjtë mund të kenë frikë të shfaqen publikisht dhe të shprehin mendimet e tyre, për shkak të sulmeve anonime në rrjetet sociale.

Kumbaro theksoi se një shoqëri që i mëson të rinjtë të heshtin rrezikon të humbasë të ardhmen e saj.

Postimi i plotë i Kumbaros

ÇFARË KOHE PO JETOJMË, KUR TAKIMI ME NJË AUTORITET PUBLIK TË KTHEN NË TË FAJSHËM?! Fajtor për çfarë?!

Që guxon të flasësh si njeri i lirë dhe i pavarur me Kryeministrin e vendit apo me një ministër? Që bën pyetje, shpreh mendimin tënd, kritikon, nuk dakordësohesh apo kërkon ndryshim?

Dhe për këtë, të kthehesh në shënjestër të sulmeve anonime nga terroristët e fjalës së lirë?!

Kush je ti, që i fshehur si cub pas anonimatit të rrjetit, guxon të masakrosh me thikën virtuale individë me emër e mbiemër, të cilët duhet të ndihen të lirë në një shoqëri që Lirinë e Fjalës e ka paguar më shtrenjtë se shumë shoqëri të tjera në Europë?!

Po ti tjetri, që nga anë e anës së ekranit, anatemon e paragjykon një të ri e i faturon takimin si akt tradhtie?! Tradhti ndaj kujt!! Madje shkon aq larg sa edhe prindin ia quan “bashkëpunëtor në krim”! Çfarë po bëjmë kështu duke vrarë në qelizë ambiciet e të rinjve për të marrë pjesë në nje debat publik!!

Si mundet që FJALA, ajo me të cilën fillojnë Librat e Shenjtë, të të kthejë në viktimë të një persekutimi publik, të organizuar nga profile me maska të zeza, që i japin vetes një mandat të pamandatuar nga askush, aq më pak nga ndonjë organizim demokratik?!

Unë isha në takimin me Kryeministrin, ku për gati tri orë diskutuam me një grup të rinjsh të ftuar nga Agjencia Kombëtare e Rinisë. Mes tyre kishte studentë, maturantë dhe ish-studentë.

Shumë prej tyre folën. Bënë pyetje, kritikuan, u ankuan, nuk u dakordësuan, propozuan, kërkuan ndryshime. Morën përgjigje, u informuan dhe, në fund, pranuan ose nuk pranuan argumentet që dëgjuan.

Askush nuk cënoi askënd. Askush nuk detyroi askënd.

Të rinjtë folën lirisht. Diskutuam. U dëgjuam. Dhe pikërisht kjo është rruga më demokratike e komunikimit në një shoqëri të lirë: të flasim pa frikë dhe të dëgjojmë pa paragjykim.

Si ministre e Arsimit, gjatë kësaj kohe kam takuar të rinj, nxënës dhe studentë, individualisht dhe në grupe. Kemi folur hapur, kemi ndarë shqetësime dhe kemi diskutuar për atë që funksionon, por edhe për atë që çalon në institucionet dhe shërbimet publike.

Këto takime na kanë ndihmuar të kuptojmë më mirë njëri-tjetrin, të kuptojmë më mirë institucionet dhe, mbi të gjitha, të identifikojmë çfarë duhet të ndryshojmë për t’iu përgjigjur më mirë pritshmërive të studentëve dhe të rinjve.

Por është tronditëse të shohësh se në vitin 2026, të rinj që duan të shprehen, kanë frikë të shfaqen publikisht duke folur normalisht!

Dhe jo nga autoriteti. Jo nga pushteti. Jo nga shteti.

Por nga terroristët anonimë të fjalës së lirë në rrjetet sociale, që kanë si armë linçimin, bullizimin dhe frikësimin.

Kur një i ri fillon të mendojë jo çfarë duhet të thotë, por çfarë do t’i ndodhë nëse e thotë, atëherë kemi një problem shumë më të madh se një debat në rrjetet sociale.

Kemi një problem me vetë LIRINË.

Paralizimi i fjalës dhe i lirisë për të dialoguar prodhon mpirje të qytetarit, të Qytetit, të mendimit dhe të veprimit social. Dhe, më tej, paralizon edhe vetë veprimin politik.

Akoma më e rrezikshme bëhet kjo kur në shënjestër vendosen të rinjtë, të cilëve shoqëria duhet t’u japë kurajë civile, t’u nxisë mendimin kritik, përballjen me argumente dhe të vërteta, dëshirën për debat dhe forcën për të vepruar.

Sepse një shoqëri që i mëson të rinjtë të heshtin, është një shoqëri që rrezikon të humbasë të ardhmen e saj.

Askush nuk ka nevojë të marrë leje nga askush për të marrë pjesë në një takim dhe për të shprehur mendimin e vet.

Dhe askush nuk ka të drejtë të ndalojë, aq më pak të kërcënojë, cilindo që zgjedh të flasë në emër të lirisë së tij për t’u shprehur dhe për t’u dëgjuar.

Liria e fjalës nuk është privilegj i atyre që bërtasin më fort. Aq më pak i atyre që shqyejnë trotuare publike apo ekonomi private.

Liria e fjalës nuk është pronë e profileve anonime! Nuk është as mandat për të poshtëruar, frikësuar apo përjashtuar të tjerët nga debati publik.

Liria e fjalës është e drejta për të folur, por edhe detyrimi për të respektuar të drejtën e TJETRIT për të folur dhe për të pasur një qasje të ndryshme.

Çdo përpjekje për të zëvendësuar argumentin me dhunën verbale, debatin me linçimin dhe mendimin e lirë me frikën, është një formë terrorizimi në hapësirën publike. Madje shumë e rrezikshme!

Shqipëria nuk e ka dhe nuk duhet ta ketë kurrë luksin të humbasë as edhe një milimetër të lirisë së saj dhe të rendit kushtetues demokratik.

Sepse këtë liri, prindërit e të rinjve të sotëm e kanë fituar me sakrificën e jetës së shkuar në diktaturë!

Dhe ne nuk kemi të drejtë t’ia dorëzojmë LIRINË frikës!

Kurrë më! (A2 Televizion)

A2 CNN Livestream

Latest Videos