Sali Berisha do të përballet me drejtësinë pa imunitetin e deputetit. Në më pak se 8 minuta, pa asnjë surprizë, me 75 votat e mazhorancës, Kuvendi miratoi heqjen e imunitetit të ish-kryeministrit, duke i hapur rrugë arrestimit të tij me akuzën për korrupsion pasiv.
Ashtu siç e parashikonte rregullorja, kryetarja e Kuvendit, Lindita Nikolla, i dha fjalën Sali Berishës, por ky i fundit refuzoi. Ai kërkoi që të hiqej garda e Republikës nga Foltorja, mirëpo një kërkesë e tillë nuk u mor parasysh, e për pasojë ish-kryeministri zgjodhi të heshtë.
As protesta jashtë parlamentit dhe as kaosi në seancën plenare, skenar i parë edhe në të kaluarën nga opozita, me karrige pirg në Foltore dhe flakadanë blu, nuk e ndalën mazhorancën që me fuqinë e kartonit, t’i hiqnin imunitetin kryetarit të opozitës. Ajo që u vu re ishte mungesa e Lulzim Bashës dhe deputetëve, mbështetës të tij.
Tashmë, pas këtij vendimi të Kuvendit, SPAK ka rrugë të lirë për t’i bërë kërkesë Gjykatës kundër Korrupsionit dhe Krimit të Organizuar (GJKKO) për llojin e masës së sigurisë, nëse do të jetë arrest shtëpie apo arrest me burg.
Berisha akuzohet se ka kryer veprime konkrete, si kryeministër, me miratime ligjesh dhe aktesh nënligjore, nga të cilat përfitoi dhëndri i tij, Jamarbër Malltezi përmes privatizimit të pronës shtetërore, kompleksi sportiv Partizani. Përgjatë gjithë retorikës së tij, ish-kryeministri ka mohuar akuzat, duke i cilësuar si politike.
SPAK kishte vendosur kushte kufizuese ndaj Berishës, në formën e paraqitjes së detyrueshme në polici në intervale të rregullta, të cilat ish- kryeministri nuk i respektoi. Ndaj tashmë, ai përballet me dy mundësi: t'i caktohet masa e paraburgimit, gjë e vështirë pasi kalon kufirin moshor të parashikuar me ligj ose të vendoset në arrest shtëpie. Për këtë të dytën, nuk ka ende asnjë qëndrim nëse Berisha do e respektojë apo jo. (A2 Televizion)
A2 CNN Livestream
MUND TE LEXONI GJITHASHTU
