Lirimi i hapësirave publike është marrë seriozisht nga Kryeministri Rama, i cili paralajmëron shkelësit në kryeqytet për ndjekje penale dhe gjoba. Si shembull kryeministri ka marrë zonën e 21 dhjetorit, një situatë klasike siç shkruan ai për ‘’tokat e xanuna’’ në Tiranë.
“Kush nuk do t’i tërheqë vetë nga hapësira publike e përbashkët barrikadat që u ka ngritur njerëzve me gjithëfarësoj objektesh, që nga tavolinat dhe frigoriferët në trotuarë e deri tek muret apo trarët e “doganave” rreth pallateve, do të ballafaqohet jo vetëm me gjobat përkatëse po edhe me ndjekjet përkatëse penale për shkatërrim të pronës publike, cënim të shëndetit e sigurisë fizike të qytetarëve, krim mjedisor dhe me radhë”, tha kryeministri.
Më i ashpër ishte me Vlorën, ku bizneseve të bar-kafeneve të Vlorës në Lungomare u la një ultimatum prej 48 orësh që të lirojnë hapësirat publike.
“Keni 48 orë kohë për t’u kthyer qytetarëve dhe turistëve trotuarët e tyre dhe për t’i larguar të gjitha llojet e hekurishteve e të betonarmeve, duke i tërhequr njëkohësisht “pergolatat” në vijën e parashikuar nga projekti i Lungomares! Nga e hëna nuk do keni më asgjë në dorë!”, shtoi Rama.
Ndërkohë, kryebashkiaku i Vlorës, u shfaq këtë të shtunë në qytet teksa bashkë me policinë bashkiake po ndërmerrnin një aksion për lirimin e hapësirave publike. Teksa u pyet nëse ky aksion erdhi pas deklaratave të kryeministrit Edi Rama pak ditë më parë, Dredha e mohoi diçka të tillë, por shtoi se kjo është një punë e përbashkët në shërbim të komunitetit.
Kryeministri u ka lënë deputetëve socialist dy javë kohë që të evidentojnë rastet në terren. Një të tillë e solli në vëmendje deputeti Erion Braçe, i cili është ndalur në një zonë të Komunës së parisit të kthyer në parking privat . (A2 Televizion)
A2 CNN Livestream
MUND TE LEXONI GJITHASHTU
