Kryedemokrati Sali Berisha mbylli çdo derë bashkëpunimi me kryeministrin Edi Ramën për të punuar kundër drejtësisë së re, pasi kishte deklaruar se qëndrimi i tij për të shkrirë SPAK-un ishte nxjerrë nga konteksti.
Nga mbledhja e grupit parlamentar, lideri demokrat pohoi se Rama po përpiqet që të bëjë analogji mes qëndrimeve të tij dhe mazhorancës kundër drejtësisë, por shtoi se asnjëherë nuk do bashkojë votat me shumicën.
“Kurrë kjo parti nuk do bashkojë votat me Edi Ramën për asnjë lloj mase ndaj sistemit të drejtësisë”, tha kryedemokrati Sali Berisha, shkruan A2 CNN.
Gjithsesi, sipas tij, drejtësia ka nevojë për reformim, por ndryshimet do të bëhen vetëm pas konsultimit me Komisionin e Venecias, duke premtuar se do të ketë zero tolerancë në luftën ndaj korrupsionit.
“Nuk mund dhe nuk duhet të ketë prokurori politike. Po kjo nuk do bëhet në asnjë rrugë tjetër përveç Komisionit të Venecias”, vijoi më tej Berisha.
Berisha komentoi edhe mbledhjen e grupit parlamentar të PS, që u shndërrua në dëgjesë për rektorin e Universitetit Bujqësor të Tiranës, lidhur me akuzat e ngritura nga SPAK për 24 zyrtarë të këtij institucioni.
“Rektori e përleu keq universitetin se kur mendon të shpëlash apo të qash për një aferë në rifuxhion e hajdutëve, duhet të mendosh 5 herë që të futesh aty”, tha ish-kryeministri.
Kreu i opozitës u mor sërish me mungesën në detyrë të Sekretarit të Përgjithshëm të Kryeministrisë, Ëngjëll Agaçi, që zyrtarisht është jashtë vendit për arsye shëndetësore, ndërsa Berisha beson se është larguar për t’iu shmangur drejtësisë.
“Tani Edi Rama është në qark, është në rreth të kuq. Laptopi i Engjëll Agaçit po bëhet si laptopi i Hunter Biden. Po, e ka zhdukur Agaçin. Se Agaçit i kanë kapur laptopin. Dhe laptopi flet dhe do flasë pafundësisht”, vijoi Berisha, shkruan A2 CNN.
Duke iu referuar zhvillimeve që vijnë nga SHBA për dosjen McGonigal, Berisha premtoi se nëse pas 11 majit fiton zgjedhjet do të ekstradojë Ramën për t’u gjykuar atje.
“Ky është zotimi ynë. Përndryshe mund të gjykohesh në Shqipëri para 11 majit”, tha Berisha.
(A2 Televizion)
A2 CNN Livestream
MUND TE LEXONI GJITHASHTU
