“Agresion nga shteti terrorist i Iranit”, Rama: Dënojmë sulmet ndaj Emirateve të Bashkuara Arabe

Kryeministri Edi Rama, ka reaguar përmes rrjetit social “X” pas sulmeve të fundit të Iranit ndaj Emirateve të Bashkuara Arabe, duke i dënuar ato ashpër dhe duke shprehur solidaritetin e plotë të Shqipërisë me këtë shtet.

Në reagimin e tij në emër të Shqipërisë, Rama i cilësoi sulmet nga “shteti terrorist i Iranit”, si një akt agresioni të pajustifikueshëm dhe një kërcënim për paqen rajonale dhe më gjerë, shkruan A2CNN. 

Kreu i qeverisë thekson se Tehrani duhet të mbahet plotësisht përgjegjës për përshkallëzimin e rrezikshëm. 

"Sulmet e përsëritura me raketa nga shteti terrorist i Iranit kundër Emirateve të Bashkuara Arabe, përbëjnë një akt të pamatur, të paprovokuar dhe krejtësisht të pajustifikueshëm agresioni kundër një shteti sovran dhe kundër vetë paqes rajonale. Emiratet e Bashkuara Arabe u përballën sërish sot me sulme me raketa dhe dronë, dhe ne, Shqipëria, e dënojmë në termat më të fortë këtë sulm terrorist nga një regjim që vazhdon të eksportojë dhunë, paqëndrueshmëri dhe pasiguri përtej kufijve të tij. Të shënjestrosh Emiratet e Bashkuara Arabe, një vend që përfaqëson paqen, progresin, stabilitetin dhe partneritetin përtej feve, racave, gjuhëve dhe rajoneve, nuk është vetëm një sulm ndaj një vendi, por një sulm ndaj vetë mundësisë së paqes dhe sigurisë në Gjirin Persik dhe shumë më gjerë", shkruan Rama. 

"Qëndrojmë në solidaritet të plotë, me udhëheqjen, popullin dhe mbrojtësit e Emirateve të Bashkuara Arabe. Ata që kërkojnë të terrorizojnë kombet e lira përmes raketave dhe intimidimit duhet ta dinë se akte të tilla vetëm sa thellojnë izolimin e tyre dhe forcojnë vendosmërinë e atyre që qëndrojnë për sovranitetin, sigurinë dhe paqen globale. Irani duhet të mbahet plotësisht përgjegjës për këtë përshkallëzim të rrezikshëm dhe, para së gjithash, për hir të vetë popullit të tij, i cili mbetet peng i një regjimi që qeveris me instinktet e Epokës së Gurit, duke e tërhequr një komb të lashtë gjithnjë e më thellë drejt izolimit, terrorit dhe vetëshkatërrimit", vijon kryeministri.  (A2 Televizion)