Lulzim Basha e mirëpriti sinjalin e dhënë nga ministri i Drejtësisë, Ulsi Manja, mbi ndryshimet Kushtetuese që do të zgjidhnin shqetësimin e përsëritur të drejtuesve të SPAK, për zgjatjen e mandatit të prokurorëve specialë.
Në një konferencë për mediat, kreu i Partisë Demokratike zyrtare tregoi gatishmëri për të bashkuar votat me socialistët, por vendosi kushtet e tij.
“E para për mandatin e prokurorëve nuk ka nevojë të ulesh me PS, është ndryshim i thjeshtë në kushtetutë. Nëse kjo do të përdoret si vegël për ndryshime të tjera për llogari të PS është manovër e ulët. Në paketën që kemi çuar janë të gjitha propozimet, t’i marrin t’i votojnë, s’po i bëjmë për veten tonë”.
Pavarësisht uljes së toneve sa i përket kësaj çështje, kur flitet për amnistinë penale të miratuar pak javë më parë nga Parlamenti, Basha ka një tjetër qasje ndaj Ulsi Manjës. Ministrin e akuzon si atentator të reformës në drejtësi pasi thotë se Manja ka gënjyer për përfituesit nga ligji i amnistisë.
“Zoti Manja u kap me presh në duar, zoti Manja është kapur duke gënjyer në Parlamentin e Shqipërisë. Siç patëm paralajmëruar ne, zoti Manja nuk ka gënjyer nga halli se kjo i doli papritur, por ka planifikuar lirimin e dhjetëra deri në 100 të burgosur të dënuar nga GJKKO”.
Gjatë konferencës për mediat, Basha u pyet dhe për grupin e punës që po harton ndryshimet e ligjeve të Reformës në Drejtësi, por shpjegoi se Partia Demokratike zyrtare nuk kishte informacion mbi këtë, çështje për të cilën është ankuar edhe te partnerët ndërkombëtarë. (A2 Televizion)
A2 CNN Livestream
MUND TE LEXONI GJITHASHTU
