“Wizz Air” ka njoftuar ndërprerje të përkohshme të rezervimeve të fluturimeve përmes platformave digjitale. Ndërprerja do të ndodhë në intervalin kohor 25 shkurt, ora 23:00 (CET) deri në 26 shkurt, ora 08:00 (CET). Kompania ajrore bën me dije se shkak është përditësimi i sistemeve me qëllim përmirësimin e përvojës së klientëve.
“Wizz Air do të pezullojë përkohësisht qasjen në platformat e rezervimeve dhe shërbimet digjitale për klientët, ndërsa kompania kryen një përditësim të planifikuar të sistemeve, me qëllim përmirësimin e besueshmërisë, stabilitetit dhe përvojës së përgjithshme të klientit”, thuhet në njoftim.
“Gjatë kësaj periudhe, klientët nuk do të kenë mundësi të aksesojnë disa shërbime digjitale, përfshirë:
• Rezervimin e fluturimeve të reja
• Ndryshimin e rezervimeve ekzistuese
• Check-in online
• Funksionet e rezervimit përmes aplikacionit celular të Wizz Air
• Përdorimin e voucher-ave dhe shërbime të lidhura me llogarinë”, vijon njoftimi.
Të gjitha operacionet e fluturimeve do të vazhdojnë sipas planifikimit dhe pasagjerët që kanë kryer tashmë check-in ose kanë shkarkuar kartat e imbarkimit nuk do të preken.
“Ne jemi të përkushtuar të ofrojmë një përvojë të qëndrueshme dhe të besueshme për klientët tanë. Ky përditësim i planifikuar do të përmirësojë më tej sistemet tona dhe do të mbështesë zhvillime të ardhshme në platformat tona digjitale. Falënderojmë klientët për mirëkuptimin e tyre teksa realizojmë këtë punë thelbësore për një përvojë edhe më të mirë”, shprehet Vera Jardan, Menaxhere e Komunikimeve Korporative në Wizz Air.
Wizz Air rekomandon që pasagjerët që udhëtojnë gjatë periudhës së ndërprerjes të kryejnë check-in online dhe të shkarkojnë kartat e imbarkimit përpara fillimit të ndërprerjes së planifikuar të sistemit.
“Megjithatë, nëse është e nevojshme, gjatë kësaj periudhe do të ofrohet check-in në aeroport pa pagesë. Linja ajrore pret që të gjitha shërbimet të rikthehen plotësisht menjëherë pas përfundimit të periudhës së mirëmbajtjes”, thuhet në njoftim.
(A2 Televizion)
A2 CNN Livestream
MUND TE LEXONI GJITHASHTU
