Real Madrid vazhdon marshimin e sigurt në Kupën e Botës, duke mposhtur Juventusin 1-0 dhe duke zgjatur serinë e ndeshjeve pa humbje në këtë kompeticion në 14. Nën drejtimin e Xabi Alonsos, madrilenët kanë regjistruar dy fitore radhazi, por sfida me bardhezinjtë rezultoi një test i vërtetë për forcën e tyre aktuale.
Në minutat e para, Juventusi ushtroi presion të madh dhe ishte shumë pranë golit kur Randal Kolo Muani shpëtoi përballë Courtois, por tentativa e tij e guximshme për ta kaluar portierin përfundoi mbi traversë. Shumë pranë avantazhit ishte edhe Kenan Yıldız, por gjuajtja e tij, që devijoi nga Tchouaméni, kaloi ngjitur me shtyllën.
Real Madrid iu deshën 30 minuta për të krijuar rastin e parë serioz, ku protagonist ishte sërish Jude Bellingham, i cili depërtoi pas mbrojtjes së Juventusit, por gjuajtja e tij u prit nga Michele Di Gregorio dhe më pas u largua nga Daniele Rugani. Portieri italian shkëlqeu edhe pak para pushimit, duke fluturuar për të devijuar një predhë të Federico Valverde nga 30 metra, shkruan A2 CNN.
Në pjesën e dytë, Valverde ishte sërish i rrezikshëm, por vetëm pak minuta më vonë, Trent Alexander-Arnold dha një asist perfekt, duke harkuar për Gonzalo García, i cili me kokë shënoi golin e vetëm të ndeshjes.
Lajm i mirë për tifozët madrilenë ishte edhe rikthimi i Kylian Mbappé, i cili u fut në lojë pas një mungese për shkak të gastroenteritit akut. Francezi pati një ndikim të menjëhershëm, duke kombinuar bukur me Arda Güler, por tentativa e turkut u neutralizua nga Di Gregorio.
Pavarësisht përpjekjeve, Juventusi nuk gjeti dot golin e barazimit dhe u eliminua. Ndërkohë, Real Madrid kualifikohet për në çerekfinale dhe duket se po gjen formën ideale në momentin e duhur. (A2 Televizion)
A2 CNN Livestream
MUND TE LEXONI GJITHASHTU
