Joan Laporta premtoi se Barcelona do të jetë “e pandalshme” pasi u rizgjodh president i klubit për pesë vite të tjera.
Duke fituar pak më shumë se 68% të votave, ai do të nisë mandatin e tij të dytë radhazi dhe të katërtin në total, nga 1 korriku, njoftoi klubi i La Liga-s të dielën.
Kundërshtari i tij, Victor Font, mori pothuajse 30% të votave, ndërsa votat e mbetura u shpallën të pavlefshme.
Pasi mori detyrën në mars të vitit 2021, Laporta dha dorëheqjen muajin e kaluar në përputhje me statutin e klubit për të kërkuar rizgjedhjen.
63-vjeçari e përshkroi rezultatin si “shumë bindës”, duke shtuar se “na jep forcë të madhe”.
“Kjo na bën të pandalshëm,” tha ai. “Askush nuk do të na ndalojë. Vite emocionuese na presin përpara. Do të jenë vitet më të mira të jetës sonë.
Ky është një klub i mrekullueshëm, ku anëtarët zgjedhin presidentin dhe bordin drejtues. Një klub unik në botë, vërtet i jashtëzakonshëm.”
Laporta, i cili drejtoi për herë të parë Barcelonën nga viti 2003 deri në 2010 dhe ishte ai që emëroi Pep Guardiolën si trajner, falënderoi anëtarët që votuan, duke e quajtur procesin një “festë të demokracisë dhe shpirtit qytetar”.
Ai premtoi se gjatë mandatit të ri drejtuesit dhe tifozët do ta “mbrojnë Barçën nga gjithçka dhe nga kushdo”.
Në fjalimin e fitores, ai premtoi gjithashtu forcimin e ekipit të parë dhe përfundimin e rindërtimit të stadiumit “Camp Nou”.
Rreth 48,500 vota u hodhën në total, një pjesëmarrje prej 42.34%, ku Laporta siguroi 32,934 vota, ndërsa 53 vjeçari Font mori 14,385.
Klubi katalanas është përballur me probleme të mëdha financiare në vitet e fundit, por sezonin e kaluar arriti të fitonte tripletën vendase.
Aktualisht ata kryesojnë rivalët e Real Madrid-it me katër pikë në krye të La Liga-s, pasi Raphinha shënoi tre gola në fitoren 5-2 ndaj Sevillës të dielën.
Të mërkurën Barcelona do të përballet me Newcastle United në ndeshjen e kthimit të fazës së 1/16-ve të Champions League.
Një penallti në minutën e 96-të nga Lamine Yamal i dha Barcelonës një barazim 1-1 në “St James’ Park” javën e kaluar. (A2 Televizion)
A2 CNN Livestream
MUND TE LEXONI GJITHASHTU
