Kategoria Superiore, Partizani ruan vendin e katërt, Tirana vijon të shpresojë për mbijetesë

Java e 34-t e Abissnet Superiore u zhvillua e gjitha në të njëjtin orar, duke sjellë emocione, gola dhe zhvillime të rëndësishme në renditje. Në “Elbasan Arena”, skuadra vendase bëri detyrën përballë Bylisit, duke marrë një fitore minimale 1-0. Kristi Qose, ish-mesfushori i Kombëtares, ishte heroi i verdhebluve, teksa shënoi me kokë pas një asisti nga Bledar Lila.

Vllaznia regjistroi një tjetër fitore të rëndësishme në “Loro Boriçi”, ku mposhti Dinamon me rezultatin bindës 3-0. Klint Qato zhbllokoi ndeshjen në minutën e 26-të, ndërsa në pjesën e dytë shënuan edhe Kevin Dodaj (64’) dhe Bekim Balaj në fundin e takimit.

Një nga sfidat më të forta të javës u luajt në Korçë, ku Skënderbeu dhe Tirana u ndanë në barazim 1-1 në një përballje me aromë “finaleje”. Saleh Nasr kaloi vendasit në avantazh në minutën e 35-të pas një gabimi të portierit Kola, ndërsa bardheblutë reaguan në pjesën e dytë, duke barazuar me një supergol nga Ndreca në minutën e 52-të.

Në “Arenën e Demave”, Partizani mori një fitore të rëndësishme 1-0 ndaj Egnatias. Goli i vetëm i takimit u realizua në minutën e 62-të nga Albers Keko, i saktë nga pika e bardhë e penalltisë.

Teuta vazhdon të shpresojë për mbijetesë, pasi arriti të marrë tre pikë të arta ndaj Laçit në “Niko Dovana”. “Djemtë e Detit” triumfuan 1-0 falë një penaltie të ekzekutuar saktësisht nga Matias Lloci, në një rast të shumëpërfolur nga kurbinasit.

Me këtë javë, Vllaznia i bashkohet zyrtarisht Dinamos dhe Egnatias në “Final Four”. Ndërkohë, vendi i katërt do të vendoset mes Partizanit dhe Elbasanit, me “të kuqtë” që aktualisht mbajnë një avantazh minimal prej një pike.

Nga ana tjetër, fitorja ndaj rivalit direkt e ndihmon Teutën të ngjitet përkohësisht në vendin e gjashtë, por mbetet ende në zonën e ftohtë. Gjendja mbetet e pasigurt edhe për Skënderbeun dhe Tiranën, të cilat nuk janë të sigurta për mbijetesën. Korçarët kanë grumbulluar 37 pikë, ndërsa Tirana renditet tetë me 36 pikë.

Fundit i sezonit të rregullt po afrohet me hapa të shpejtë dhe vetëm dy javë ndajnë skuadrat nga verdikti final. Të gjitha sytë janë tashmë te javët vendimtare që do të përcaktojnë fatin e ekipeve në këtë sezon dramatik të Superiores. (A2 Televizion)