Tabaku: Rama tregoi se çdo gjë që ka thënë në opozitë, e ka pasur gënjeshtër

Jorida Tabaku, anëtare e Kryesisë së Partisë Demokratike, deklaroi se qeveria aktuale “nuk e ka kthyer vëmendjen nga rrugët, por nga koncesionet”.

“Kjo qeveri vetëm ka përfunduar një ose dy rrugë që ishin lënë nga Partia Demokratike. Shtesa në buxhet shkon e gjitha për koncesionet. Rama, pas 7 vitesh qeverisje, ka treguar se çdo gjë që ka thënë në opozitë, e ka pasur gënjeshtër”, theksoi Tabaku.

“Kryeministri tha se eurobondi tregoi se financat e shtetit janë në rregull, por edhe këtu gënjeu sepse bëri akt normativ ku tregoi se borxhi nuk ishte aq sa ishte. Librat e llogarive nuk treguan të vërtetën. Pse nuk e rishikoi buxhetin kur mori eurobondin? Që edhe partnerët ndërkombëtarë të kishin një pikëpamje të qartë për financat publike të Shqipërisë. E ka futur Shqipërinë në një spirale të rrezikshme”, shtoi Tabaku.

Sipas saj, Rama po shumëzon me zero popullin për të paguar koncesionet: “E di që është shumë e vështirë që të menaxhohen financat publike në një situatë krize globale, por të shumëzosh me zero 3 milionë shqiptarë dhe të vazhdosh të paguash ato 11 koncesione, është kriminale”.

“Të gjitha projektet e kësaj qeverie do të mbeten në letër, nuk kanë për t’u realizuar. Kjo qeveri ka qenë e mirë vetëm për koncesione dhe tendera, por asnjë punë reale”, tha Tabaku. (A2 Televizion)