Unioni Mbarëkombëtar i të Burgosurve dhe të Përndjekurve Politikë kërkon ngritjen e një parcele Përkujtimore për 4 mijë e 500 të zhdukurit nga regjimi komunist. Iniciativës i janë bashkuar edhe komunitetet fetare të vendit tonë.
Osman Kaceli është një prej mijëra të persekutuarve të sistemit komunist. Një shpërthim në ambasadën sovjetike nxiti autoritetet e kohës të pushkatonin 22 qytetarë, mes të cilëve edhe babain e Osmanit, asokohe 43 vjeç.
Jetim dhe i persekutuar, kështu nisi jeta për Osman Kacelin dhe fëmijët e familjes së tij.
“Isha vetëm 9 vjeç. Ishim 7 fëmijë dhe nëna që na çuan në Skrapar. Motra më e vogël 3 vjeç, më e madhja 17. Kemi punuar punë të rënda”.
Osmani e quan veten me fat pasi në vitin ‘93 arriti të gjejë eshtrat e të atit. Por 30 viteve pas daljes nga regjimi komunist, janë me mijëra të pushkatuar të cilët nuk kanë një varr.
“Kërkojmë të kemi ndërtimin e varrezave memoriale pas universitetit të Tiranës për 4500 të zhdukurit”.
Iniciativa është mbështetur edhe nga komunitetet fetare të vendit tonë.
“Varrezat janë përkujtimore, e shkuara dhe e ardhmja e një kombi”.
“Misionin Kombëtar i Kujtesës” është angazhimi që u firmos simbolikisht nga drejtuesit e komuniteteve fetare së bashku me kreun e Unionit mbarëkombëtar të të përndjekurve politike. (A2 Televizion)
A2 CNN Livestream
MUND TE LEXONI GJITHASHTU
