Bie retorika e luftës dhe e përçarjes në Bosnje e Hercegovinë. Palët i ka zbutur zv/ndihmës-sekretari amerikan i Shtetit për Europën dhe Euroazinë, njëherësh i dërguari për Ballkanin Perëndimor, Gabriel Escobar, i cili gjendet në Sarajevë.
Ai duket se ka bindur liderin e serbëve të Bosnje e Hercegovinës, Millorad Dodik që të tërheqë vendimet e tij lidhur me kompetencat drejtuese dhe të vazhdojnë bisedimet për zhvillimin ekonomik. Escobar u takua dhe me anëtarët e tjerë të presidencës trepalëshe të Bosnje dhe Hercegovinës, Jelko Komshiç, Sefik Xhaferoviç.
“Të gjithë jemi dakord që nuk do të ketë luftë dhe mendoj se ky është mesazhi më i rëndësishëm. Nuk është një mesazh që do ta dëgjoni vetëm nga ata liderë që takova sot, është një mesazh që do ta dëgjoni edhe nga liderët e rajonit”, tha Escobar.
Zyrtari i Shteteve të Bashkuara të Amerikës nënvizoi se është e rëndësishme të sigurohet që Bosnje e Hercegovina të mbetet e bashkuar, sovrane dhe me integritet territorial. Përpara këtyre raportimeve, përfaqësuesi i lartë europian në Bosnjë-Hercegovinë, Christian Schmidt, komentoi për Reuters pasojat e një shpërbërje të mundshme të Bosnje e Hercegovinës.
“Nëse vendi ndahet, diçka që për momentin nuk është e afërt dhe nuk e synon asnjë shtet, Bashkimi Europian dhe Serbia do të duhet të rikalibrojnë busullat e tyre politike. Për mua, është në interesin e vetë Serbisë që Bosnjë-Hercegovina të ketë stabilitet. Trazirat në këtë rajon do të ndikojnë edhe në marrëdhënien e vështirë mes Serbisë dhe Kosovës në një mënyrë të njëjtë ose të ngjashme”, u shpreh Christian Schmidt.
Kriza e fundit në Bosnje e Hercegovinë shpërtheu pas paralajmërimit të liderit serb të Bosnjës, Milorad Dodik, për krijimin e një ushtrie të serbëve të Bosnjës brenda federatës. Schmidt paralajmëroi ndër të tjera se nëse vijohet me degradimin e marrëveshjes së Dejtonit, “ka shumë gjasa që vendi të ndahet”. (A2 Televizion)
A2 CNN Livestream
MUND TE LEXONI GJITHASHTU
