Dialogu mes Kosovës dhe Serbisë mund të vazhdojë vetëm nëse procesi do të jetë i pakushtëzuar. Qëndrimin e tij presidenti i Kosovës, Hashim Thaçi, e përsëriti në një konferencë për shtyp pas kthimit nga samiti i Berlinit.
Sipas tij, taksa prej 100 përqind, që Qeveria e Kosovës u ka vënë importeve të Serbisë dhe Bosnjës, ka qenë vendim i drejtë dhe se duhet të mbetet në fuqi. Kjo masë është përmendur vazhdimisht nga presidenti serb, Aleksandar Vuçic si shkak për bllokim të procesit të dialogut, që zhvillohet me ndërmjetësimin e Bashkimit Europian në Bruksel.
Por ky qëndrim zyrtar i Thaçit, bie në kundërshti me pretendimet e Kryeministrit Ramush Haradinaj, i cili tha se në bisedimet e Berlinit presidenti i Kosovës dhe kryeministri shqiptar Edi Rama i kishin bërë më shumë presion se ndërkombëtarët për heqjen e taksës.
Ndërkaq, zëdhënësi i qeverisë gjermane, Stefan Zibert, konfirmoi të martën se më 1 korrik do të zhvillohet takimi i dytë në Paris, me pjesëmarrjen e Gjermanisë, Francës, Serbisë dhe Kosovës. Ndërsa pohoi se normalizimi i marrëdhënieve mes Serbisë dhe Kosovës do të ishte në fokus të takimit, Zibert nuk dha detaje se si do ta arrinin këtë. (A2 Televizion)
A2 CNN Livestream
MUND TE LEXONI GJITHASHTU
