VAR-i ishte një nga protagonistët e supersfidës Liverpool-Manchester City, të përfunduar me rezultatin 3-1 për vendasit.
Në minutën e 83-të të ndeshjes, Sterling krosoi në zonë dhe topi goditi dorën e majtë të Alexander-Arnold. Një penallti e mundshme mund ta ngushtonte rezultatin në 3-2, por arbitri kryesor Michael Oliver dhe arbitri i VAR-it, Paul Tierney nuk e panë të arsyeshme të akordonin 11-metërsh.
Ky vendim bëri që Pep Guardiola të protestonte me ulërime te arbitri i katërt, duke i kujtuar se kjo ishte penalltia e dytë që nuk i jepej ekipit të tij. Aksioni i parë i dyshimtë ishte sërish me protagonist Alexander-Arnold, i cili me krahun e hapur preku një tjetër top në zonë dhe nga aty nisi kundërsulmi që çoi në golin e parë të Liverpool, me autor Fabinho.
Në konferencën për shtyp pas ndeshjes, Guardiola “shpërtheu”: “Mos më pyesni mua për penalltitë, pyesni shefin e VAR-it dhe atyre që janë përgjegjës në ndeshje për VAR-in. Unë dua të flas për ndeshjen që zhvilluam, një nga ndeshjet më të mira tonat”.
Kur iu vu në dukje se shefit të VAR-it nuk i lejohet të japë deklarata për mediat, Guardiola u tha gazetarëve: “Bjerini telefonit, shkojini në shtëpi dhe trokitini në derë. Bëni çfarë të doni, por po ju lutem që të mos më pyesni mua”. (A2 Televizion)
A2 CNN Livestream
MUND TE LEXONI GJITHASHTU
