Viti i ri akademik nis me bojkot të mësimit. Pedagogët e Universiteteve të Tiranës i janë përgjigjur thirrjes së sindikatës për të pezulluar procesin mësimor. Ashtu siç ishte paralajmëruar, në auditorë kanë hyrë vetëm studentët e viteve të para për t`u njohur me orarin dhe pedagogët.
Pas orës 10:00 në çdo fakultet stafet akademike kanë protestuar para ambienteve të punës. Mbështesin kërkesat e sindikatës për rritjen 50% të pagave të tyre. Nga korpusi universitar kreu i sindikatës Sandër Kovaçi deklaron vijimin e bojkotit pa afat nëse nuk do të ketë vendime konkrete nga qeveria.
Në kohën kur pedagogët zhvillonin protestën, drejtuesit e universitetit Politeknik u njoftuan për një vizitë të beftë nga kryeministri Edi Rama. Sipas informacioneve, do të inspektonte një nga laboratorët e universitetit. Sipas protokollit punonjësit e gardës ishin vendosur më herët në oborrin e korpusit. Edhe rektori me të tijtë zbritën për ta pritur, por pas disa minutash u njoftuan për anulimin e vizitës.
Por në Fakultetin e Mjekësisë bojkoti është thyer nga vizita e ministres së Shëndetësisë. Ogerta Manastirliu është kujdesuar që gjatë fjalës së saj të tregojë se viti akademik ka nisur në të gjitha universitete. Me pas si ministre e Shëndetësisë ka folur edhe për investimet në sektorin e saj.
Vetëm pak orë pas mesditës përmes zyrës së shtypit u njoftua se ministrja e Arsimit kishte kryer një vizitë tek Universiteti Politeknik, sërish duke shpërfillur protestën e pedagogëve, por duke folur për riinvestime dhe mbështetje për shkollat e larta.
Ndërkohë sindikata e pedagogëve ka vendosur që edhe në 18 tetor nuk do të ketë mësim. Bojkoti do të nisë në orën 8 të mëngjesit në çdo fakultete dhe në orën 10 të gjitha stafet akademike të Tiranës do të protestojnë para korpusit universitar. (A2 Televizion)
A2 CNN Livestream
MUND TE LEXONI GJITHASHTU
