Zjarri në Gjirokastër, prefekti i qarkut për A2: Presim ndërhyrjen nga ajri. Bashkëshortja e viktimës është nisur drejt Tiranës

Prefekti i qarkut të Gjirokastër, Odise Kote, foli në Ditarin e mbrëmjes në A2 për situatën e zjarreve në këtë qark, duke bërë të ditur se sipërfaqja e përfshirë nga flakët është shumë e madhe. Kote u shpreh se bashkëshortja e 60-vjeçarit që ndërroi jetë nga zjarri është nisur drejt Tiranës për ndihmë më të specializuar pasi ka pësuar djegie.

“Është përfshirë nga zjarri një territor prej rreth 5 kilometrash në vijë ajrore. Sipërfaqja ka qenë shumë e madhe. Janë mobilizuar të gjithë zjarrfikëset e qarkut Gjirokastër, pothuajse të gjithë kanë qenë në terren. Rreth orës 15:00 ka ndodhur një aksident, ku një 60-vjeçar ka humbur jetën, ndërsa bashkëshortja e tij ka marrë plagë si pasojë e djegieve. Ajo është shoqëruar me helikopter për në Tiranë”.

Prefekti i qarkut të Gjirokastër theksoi se aktualisht po pritet ndërhyrja nga ajri, pasi ka shumë vatra zjarri, ndërsa terreni është shumë i vështirë. (A2 Televizion)