Policia e Lezhës ka organizuar brenda 12 orëve dy operacione policore për goditjen e veprimtarisë kriminale në fushën e narkotikëve në zonën e Mirditës. Gjatë operacioneve “Munella” dhe “Kaçinari” janë sekuestruar në total 49.6 kg kanabis, janë arrestuar 3 persona si dhe është proceduar në gjendje të lirë një tjetër.
“Në kushte të vështira të motit dhe në terren të thyer malor, shërbimet e Policisë Lezhë, në bashkëpunim me FNSh Shkodër, mbi bazën e informacioneve të siguruara në rrugë operative kanë organizuar dhe finalizuar me sukses, brenda 12 orëve, 2 operacioni policore në kuadër të të cilëve, janë vënë në pranga 3 shtetas dhe sekuestruar një sasi e konsiderueshme lënde narkotike”, njofton policia.
Në operacionin policor të koduar "Munella", në fshatin Domgjon, Fanë, Mirditë, shërbimet e Policisë gjatë kontrollit të ushtruara në banesat e shtetasve V.Ll. dhe P.N., kanë gjetur dhe sekuestruar në cilësinë e provës materiale 31 kilogramë e 600 gramë lëndë narkotike e dyshuar cannabis sativa,
Në përfundim të veprimeve, specialistët për Hetimin e Narkotikëve dhe Trafiqeve në DVP Lezhë, bënë arrestimin në flagrancë të shtetasve: V.Ll., 49 vjeç, lindur në Domgjon, Mirditë, banues në Zejmen, Lezhë dhe P.N. 43 vjeç, lindur në fshatin Xhuxhë, Mirditë, banues në Tale, Lezhë, për veprën penale "Prodhimi dhe shitja e narkotikëve, kryer në bashkëpunim, thuhet në njoftim.
Në kuadër të operacionit policor të koduar "Kaçinari " , në fshatin Arrëz, Kaçinar , shërbimet e Policisë kanë ushtruar kontroll në banesën e shtetasit B.Ç. dhe kanë gjetur dhe sekuestruar në cilësinë e provës materiale 18 kilogramë lëndë narkotike të dyshuar cannabis sativa.
Specialistët për Hetimin e Narkotikëve në DVP Lezhë, bënë arrestimin në flagrancë të shtetasit:B.Ç.,36 vjeç, banues në fshatin Arrëz,Mirditë, për veprën penale "Prodhimi dhe shitja e narkotikëve ", si dhe proceduan penalisht në gjëndje të lirë për shkak të problemeve shëndetësore, babain e tij shtetasin P.Ç., thuhet në deklaratën e Policisë
Materialet hetimore u referuan në Prokurorinë e Rrethit Gjyqësor Lezhë, për veprime të mëtejshme. (A2 Televizion)
A2 CNN Livestream
MUND TE LEXONI GJITHASHTU
