Mjekësia në protestë: Vetëm anulimi i ligjit na kthen në universitet

Miratimi i tarifës së shkollimit për studentët e Mjekësisë ka shtuar zemëratën dhe pakënaqësitë e tyre. Të rinjtë e Mjekësisë së Përgjithshme nuk pranojnë as kontratën me fakultetin për të qëndruar pas studimeve në Shqipëri dhe as të paguajnë 248 mijë lekë për studimet vjetore.

Në ditën e tetë të bojkotit të mësimit, studentët kanë marshuar sërish drejt Ministrisë së Arsimit, aty ku kanë zhvilluar protestën e radhës.

Më të organizuar dhe më të vendosur në kërkesën e tyre, studentët e Mjekësisë kanë bllokuar për më shumë se një orë  qarkullimin në Rrugën e Durrësit.  

Të indinjuar nga heshtja e drejtuesve të këtij dikasteri, të rinjtë kanë  qëlluar me vezë godinën e Ministrisë dhe kanë hedhur flakadanë.

Me pankarta dhe thirrje të ndryshme mjekët e ardhshëm e kanë cilësuar të padrejtë dhe antikushtetues ligjin për degën e Mjekësisë së Përgjithshme.  

Pas më shumë se një orë protestë dhe asnjë reagim nga Ministria e Arsimit, të rinjtë janë shpërndarë. Vetëm anulimi i ligjit mund t’i kthejë në auditorë, ndërsa theksojnë vijimin pa afat të bojkotit.  (A2 Televizion)