Kryeministri Edi Rama komentoi emërimin e drejtuesit të ri të Prokurorisë së Posaçme, Altin Dumani. “Procesi i zgjedhjes së drejtuesit të ri të SPAK foli vetë për të gjithë ata që duan të dëgjojnë dhe të gjitha thashethemet e katundit politik e mediatik për kapjen e “skapjen” e SPAK-ut nga regjimi i mori era! Urime drejtuesit të ri dhe fjalën le ta marrë puna me rezultate konkrete!”, shkroi Rama në Twitter.
Për zgjedhjen e Dumanit reagoi edhe ambasada amerikane, ku përmes një deklarate e përgëzoi për marrjen e detyrës, duke vlerësuar gjithashtu dy kandidatët e tjerë, Adnan Xholi dhe Edvin Kondili.
“Presim me kënaqësi të mbështesim zotin Dumani dhe SPAK-un ndërsa ata vazhdojnë luftën kundër korrupsionit dhe krimit të organizuar. Puna e SPAK-ut duhet të vazhdojë të demonstrojë që askush nuk është mbi ligjin. Koha e pandëshkueshmërisë ka marrë fund. Reforma në drejtësi nuk është vetëm një kusht për anëtarësimin në BE, është një kërkesë e drejtë e popullit shqiptar. Shtetet e Bashkuara do qëndrojnë gjithnjë krah popullit shqiptar. Falënderojmë Këshillin e Lartë të Prokurorisë për një proces përzgjedhës i cili pati qëllim të siguronte integritetin e procesit. Është thelbësore për institucionet e drejtësisë që të veprojnë me integritet, pa frikë apo favore. Vlerësojmë shumë zotin Kraja për udhëheqësinë dhe përkushtimin e tij si Kryeprokurori i SPAK. Ai vendosi themele të forta mbi të cilat pasardhësit e tij mund të ndërtojnë”, thuhet në reagimin e ambasadës.
Në zgjedhjen e Dumanit ishte e pranishme edhe ambasadorja Yuri Kim, e cila mbërriti në godinën e Polit të Drejtësisë vetëm gjatë intervistimit të kandidatit të tretë, Edvin Kondili. Ky kandidat mori 4 vota ndërsa kandidati tjetër, Adnan Xholi mori vetëm 1 votë. (A2 Televizion)
A2 CNN Livestream
MUND TE LEXONI GJITHASHTU
