Shembet ura gjigande në Pekin

Një ngjarje e pazakontë ka ndodhur në distriktin verilindor Shunyi të Pekinit, ku ura mbi lumin Chaobai është shembur pjesërisht pas një zjarri që përfshiu strukturën e saj.

Autoritetet kineze nuk raportojnë për të lënduar, pasi qarkullimi në urë ishte ndërprerë më herët për arsye sigurie. Zjarri, i cili shpërtheu në orët e para të mëngjesit, ka shkaktuar dëme të konsiderueshme në pjesën qendrore të urës, duke çuar në shembjen e saj për shkak të dobësisë strukturore të krijuar nga flakët.

Sipas raportimeve nga autoritetet lokale dhe agjencia Associated Press, flakët janë vënë nën kontroll dhe tashmë po kryhen hetime për të zbuluar shkakun e zjarrit.

Pamje që qarkullojnë në rrjetet sociale tregojnë momente dramatike me tym të dendur gri që ngrihet nga ura, ndërsa zjarrfikësit punojnë për ta izoluar flakët. (A2 Televizion)