I ftuar edhe Kryeministri Rama, George Soros mungon në dasmën luksoze të djalit të tij Alex Soros dhe Huma Abedin

Një nga ngjarjet më të bujshme të fundjavës në SHBA ishte padyshim dasma e Alex Soros, djali i filantropit dhe donatorit miliarder të Partisë Demokrate atje, George Soros, me Huma Abedin, ish-këshilltare e afërt e Hillary Clinton. Ceremonia u zhvillua të shtunën në rezidencën madhështore të Alex Soros në Water Mill, Hamptons, ku morën pjesë figura të njohura të politikës dhe showbizit amerikan.

Në mesin e të ftuarve, ku ishte i pranishëm edhe Kryeministri Edi Rama, morën pjesë edhe ish-Presidenti amerikan Bill Clinton dhe bashkëshortja e tij Hillary Clinton, zv.presidentja Kamala Harris me bashkëshortin Doug Emhoff, ish-Kryetarja e Dhomës së Përfaqësuesve Nancy Pelosi, lideri i shumicës në Senat Chuck Schumer, si dhe kreu i demokratëve në Dhomën e Përfaqësuesve Hakeem Jeffries. Nga bota e artit dhe modës, nuk munguan Jimmy Fallon dhe drejtoresha e revistës Vogue, Anna Wintour.

Megjithatë, mungesa më e vërejtur ishte ajo e vetë George Soros, babait të dhëndrit dhe një prej figurave më të fuqishme të biznesit dhe politikës në SHBA. Sipas raportimeve të Page Six, Soros 94-vjeçar nuk mori pjesë në ceremoninë e së shtunës, por organizoi një shërbesë intime familjare të premten në shtëpinë e tij në Southampton, së bashku me bashkëshorten Tamiko Bolton. Kjo ceremoni u drejtua nga një rabin dhe një imam, në nderim të besimeve të ndryshme fetare të çiftit - hebraike për Alex dhe myslimane për Huma.

Një burim pranë familjes ka deklaruar se George Soros gëzon shëndet të mirë dhe se vendimi për të mos marrë pjesë në dasmën e madhe nuk kishte të bënte me shëndetin e tij. Në fakt, Alex ndau një fotografi me të atin në rrjetet sociale për Ditën e Babait, ku të dy shfaqen të buzëqeshur dhe i veshur me kostumin e dasmës.

Alex Soros u shfaq me një smoking blu nga Dior – një ngjyrë me domethënie të veçantë për të, pasi shpesh ishte veshur njësoj me të atin në takimet e punës. Nga ana tjetër, nusja Huma Abedin shkëlqeu me një fustan elegant Givenchy dhe kishte marrë këshilla të shumta nga mikja e saj e afërt Anna Wintour për organizimin e dasmës.

Historia e dashurisë mes Abedin dhe Soros nisi në vjeshtën e vitit 2023 gjatë ditëlindjes së Nicky Hilton Rothschild, ndërsa fejesa u shpall në maj të vitit 2024 në Nju Jork. (A2 Televizion)