Bashkë, por të ndarë. Autoritetet në Vlorë për Pavarësinë, demokratët në Tiranë

109-vjetori i pavarësisë së Shqipërisë ka bërë bashkë në Vlorë Presidentin Ilir Meta, kryeministrin Edi Rama dhe kryetarin e Bashkisë së Vlorës, Dritan Leli.  

Ceremonia e ngritjes së flamurit dhe homazhet u zhvilluan në sheshin historik të qytetit, i cili është në fazë rikontruksioni. As kjo ditë e shënuar nuk ka shërbyer për shuarjen e mërive politike. Gjatë gjithë ceremonisë përkujtimore, Meta dhe Rama kanë mbajtur distancë nga njëri-tjetri dhe jo për shkak të pandemisë.

Edhe më i largët dukej kryebashkiaku i Vlorës nga kryeministri Edi Rama.

Edhe në ikje, asnjë përshëndetje e komunikim mes tyre. Vetëm pas largimit, Kreu i Shtetit dha mesazhin për reflektim dhe bashkim.

Të ndarë i ka gjetur edhe demokratët 109-vjetori i Pavarësisë. Nga Varrezat e Dëshmorëve në Tiranë, ata përkujtojnë sot edhe çlirimin e vendit.

Ceremonitë dhe aktivitetet për 109-vjetorin e Pavarësisë janë zhvilluar edhe në qytete të tjera të vendit. (A2 Televizion)