Bombardimet ajrore të forcave ruse dhe ushtrisë qeveritare në Siri po detyrojnë banorë të shumtë të zhvendosen. Mbi 11 mijë civilë kanë lënë shtëpitë e tyre në qytetin Idlib dhe janë në arrati. Ndërsa bilanci i viktimave është tepër i rëndë. Të paktën 17 persona të vrarë dhe dhjetëra të tjerë të plagosur. Kjo është bërë e ditur nga dëshmitarë në terren që janë në kontakt të vazhdueshëm me zyrën e Kombeve të Bashkuara për koordinimin e ndihmës humanitare.
Sirianët që kanë braktisur shtëpitë e tyre janë drejtuar për në lagjet e tjera të Idlibit, jashtë zonave të kontrolluara nga rebelët ose drejt kufirit me Turqinë, që mbetet i mbyllur për civilët në arrati. Pjesa më e madhe e qytetarëve në arrati është pa një çati mbi kokë dhe ekspozohet kushteve të këqija të motit ose gjejnë strehim në kampet e ngritura për refugjatët.
Që prej të hënës vazhdojnë bombardimet e artilerisë nga ana e qeverisë siriane dhe forcave ruse, aleate të Damaskut, kundër rajonit të Idlibit që kontrollohet në pjesën më të madhe nga rebelët dhe militantët anti-regjimit të Bashar Al Assad. OKB ka bërë me dije se në këtë qytet mbeten rreth 3 milionë civilë në nevojë urgjente për ndihmë humanitare. (A2 Televizion)
A2 CNN Livestream
MUND TE LEXONI GJITHASHTU
