Policia e Tiranë ka publikuar pamjet e grabitjes së ndodhur pak pas orë 08:00 të mëngjesit të sotëm në një pikë të këmbimit valutor në zonën e “Astirit”, në kryeqytet.
Në pamjet e kamerave të sigurisë, shihet grabitësi me kostum sportiv, kapele dhe maskë kirurgjikale që hyn brenda ambienteve dhe kërcënon me armë zjarri dy punonjëset e Exchange-it.
Duke mbajtur armën dorën e djathtë, me dorën tjetër ai tërheq me forcë njërën prej punonjësve dhe e detyron që të hapë kasën duke marrë më pas prej aty një shumë të hollash.
Pasi arrin qëllimin grabitësi del i pashqetësuar nga pika e këmbimit valutor dhe sipas njoftimit të uniformave blu është larguar nga vendngjarja me biçikletë.
Policia e Tiranës sakaq i bën thirrje qytetarëve që të ndihmojnë në zbardhjen e ngjarjes dhe për secilin që jep informacion mbi autorin jep një shpërblim prej 5000 euro.
“DVP Tiranë fton qytetarët që të japin informacion për autorin e kësaj ngjarjeje dhe vendos shpërblim 5000 euro, për çdo informacion të vlefshëm që do të çojë në kapjen e autorit. Drejtoria Vendore e Policisë Tiranë vendos në dispozicion të qytetarëve, numrin e telefonit 0694110415, duke garantuar anonimatin e plotë të çdo telefonuesi”, thuhet në njoftimin e policisë. (A2 Televizion)
A2 CNN Livestream
MUND TE LEXONI GJITHASHTU
