Ina Zhupa dhe Belind Këlliçi, të dy nga Partia Demokratike, janë paraqitur këtë të martë në gjykatë, aty ku janë paditur nga Mirel Mërtiri për akuzat e ngritura nga PD për aferën e pretenduar të inceneratorit të Tiranës.
Pas mbajtjes së seancës, Zhupa u shpreh se Mërtiri nuk është paraqitur në sallën e gjyqit, ndërsa theksoi se padia ndaj tyre është bërë që të tërhiqen nga beteja e tyre.
“E gjithë kjo padi është bërë që ne të trembemi, që ne të tërhiqemi nga beteja përballë atyre që zotërojnë inceneratorin e Tiranës, por edhe zyrtarëve të lartë publik që ua kanë dhënë inceneratorin e Tiranës, por as unë dhe as Këlliçi, as partia politike që ne përfaqësojmë nuk kemi ndërmend të tërhiqemi nga beteja për të mbrojtur interesin e qytetarëve. Do të qëndrojmë përballë. Do të themi të vërtetat gjithë kohës. E kemi çuar këtë çështje për padi edhe në SPAK dhe do të jetë SPAK-u që do ta gjykojë edhe më thellë çështjen e inceneratorit të Tiranës, inceneratorit të Fierit, por edhe inceneratorin e Elbasanit. Çdo ditë bashkia e Tiranës paguan për inceneratorin e Tiranës 650 tonë mbetje, pavarësisht punës që bëjnë. Ne deri më sot kemi paguar 23 milionë euro në kontot e inceneratorit, që nuk ekziston të Tiranës. Çdo vit parashikohet që do të paguajmë 6.8 milionë euro, po për inceneratorin e Tiranës”, u shpreh Ina Zhupa.
Më tej, ajo theksoi se asgjë nuk është personale me Mirel Mërtirin. “Ne do të qëndrojmë. Sot ishte seanca e dytë. Do të kemi edhe përballje të tjera me z.Mërtiri, i cili na ka hedhur në gjyq, duke gjykuar se ne kemi shpifur. Ndërkohë që ne po themi të vërtetat dhe nuk kemi asgjë personale me z.Mërtirin, as nuk e njohim personalisht, as nuk kemi interes personal, por kemi thjesht interesin publik të çështjes së inceneratorëve të Tiranës”. (A2 Televizion)
A2 CNN Livestream
MUND TE LEXONI GJITHASHTU
