Departamenti i Sigurisë Kombëtare (DHS) ka publikuar të mërkurën një raport mbi terrorizmin, duke paralajmëruar rreth mundësisë për dhunë të vazhdueshme nga njerëz të motivuar nga ndjenja anti-qeveritare pas zgjedhjes së presidentit, Joe Biden. Sipas raportit, trazirat e 6 janarit në Kapitol mund të inkurajojnë ekstremistët të krijojnë kushte për sulme të reja, njofton Zëri i Amerikës.
Në raport, vihej në dukje një mjedis kërcënues edhe më i madh në të gjithë Shtetet e Bashkuara që sipas, Departamentit amerikan të Sigurisë Kombëtare do të vazhdojë me marrjen e detyrës nga zoti Biden, më 20 janar.
"Informacioni sugjeron që disa ekstremistë të dhunshëm të motivuar ideologjikisht e që kundërshtojnë ushtrimin e autoritetit qeveritar dhe tranzicionin presidencial, apo për shkak të pakënaqësive të tjera të perceptuara, të nxitura nga histori të rreme, mund të vazhdojnë të mobilizohen për të nxitur ose kryer akte dhune", thuhej në raport.
Aty nuk përmendej ndonjë lidhje ideologjike ose politike, por paralajmërohej për "individë të irrituar me ushtrimin e autoritetit qeveritar dhe tranzicionin presidencial, si dhe ankesa të tjera të perceptuara e shkaqe ideologjike të nxitura nga histori të rreme".
Në raportin e Departamentit të Sigurisë Kombëtare thuhej se këta individë, mund të vazhdojnë të mobilizojnë një gamë të gjerë aktorësh të motivuar ideologjikisht për të nxitur ose kryer dhunë.
Nuk është e pazakontë që qeveria federale të paralajmërojë organet lokale të zbatimit të ligjit përmes publikimit të raporteve e këshillave mbi mundësinë e kryerjes së akteve të dhunës lidhur me një datë ose ngjarje të veçantë, siç është 4 korriku.
Por ky raport i veçantë, i lëshuar përmes Sistemit Kombëtar Këshillues për Terrorizmin e këtij departamenti, dallon sepse vendos efektivisht administratën e presidentit Biden në mesin e një debati të ngarkuar politik mbi mënyrën se si përshkruhet apo karakterizohen aktet e motivuara nga ideologjia politike dhe sugjeron se e sheh dhunën që synon përmbysjen e rezultatit të zgjedhjeve të ngjashme me terrorizmin.
Dokumenti sugjeron se zyrtarët e Sigurisë Kombëtare shohin lidhje mes dhunës së vitit të kaluar dhe dhunës së motivuar nga ndjenjat anti-qeveritare, qofshin këto kundër kufizimeve për pandeminë e COVID-19, rezultatet e zgjedhjeve apo përdorimin e forcës nga policia.
Alarmi vjen në një kohë të tensionuar pas protestës së dhunshme në Kapitol nga mbështetësit e ish-presidentit Donald Trump të cilët po kërkojnë të përmbysnin rezultatin e zgjedhjeve presidenciale. Raporti i Departamentit të Sigurisë Kombëtare flet edhe për sulmet e dhunshme në "ditët e fundit", një referencë e dukshme për ngjarjet në Portland të Oregonit, të lidhura me grupet anarkiste. (A2 Televizion)
A2 CNN Livestream
MUND TE LEXONI GJITHASHTU
