Fermerët e Beratit dhe Fierit po e hedhin prodhimin e këtij sezoni në kanal. Dhjetëra tonë domate nuk janë eksportuar dot në tregun e rajonit për shkak të rënies së konsumit nga pandemia.
Tregu i brendshëm është i pafuqishëm për të përballuar të gjithë prodhimin vendas. Kjo situatë po rëndon ekonomikisht fermerët, të cilët duhet të kishin nisur përgatitjet për sezonin e ardhshëm.
“Ka rënë kërkesa pasi nuk ka konsum në rajon. Sidomos zona e Beratit dhe e Fierit po e shesin nën kosto", shprehet Eduart Sharka, kryetari i Sindikatës së Fermerëve.
Aktualisht, një kilogram domate po blihet nga tregtarët me çmim nga 20 deri në 30 lekë. Çmim ky që nuk mbulon dot as shpenzimet e prodhimit për bimë.
“Fermerët kanë shumë shpenzime, dhe nuk po i mbulojnë dot, kështu që i hedhin në kanal. Salcë nuk bëhen pasi është domate për treg, jo për industri”, shton ai.
Nga një vëzhgim i bërë nga A2 Cnn, çmimi i domates në kryeqytet varion nga 70 deri në 100 lekë për kilogram. Tregtarët thonë se furnizohen nga prodhimi vendas, por jo në sasi të mëdha.
Sindikata e Fermerëve kërkon që Ministria e Bujqësisë të ngrejë zyra të studimit të tregjeve dhe orientimit për fermerët për mbjelljen e fruta-perimeve, sipas kërkesës nga konsumatori. (A2 Televizion)
A2 CNN Livestream
MUND TE LEXONI GJITHASHTU
